Þuríður Harpa Sigurðardóttir, sem er lömuð fyrir neðan brjóst eftir að hafa dottið af hestbaki fyrir tveimur árum, vonast eftir að fá hreyfigetu með því að fara í stofnfrumumeðferð til Indlands.

„Það er í raun ömurlegt að eina úrræðið sem menn hafa á þessari tækniöld er að segja lömuðu fólki að það þurfi að sætta sig við að vera í hjólastól það sem eftir er ævinnar. Þetta eru bara hlutir sem fæstir geta hugsað sér,“ segir Þuríður sem var nýorðin fertug þegar slysið varð.

Allir fengið einhverja bót

Hún kveðst hafa lesið um góðan árangur af stofnfrumumeðferðinni í Delí á Indlandi. „Læknirinn hefur meðhöndlað yfir 700 sjúklinga og af þeim voru 150 með mænuskaða. Enginn hefur hlotið skaða af meðferðinni. Allir hafa hlotið einhverja bót, allt frá því að hreyfa tær upp í það að ganga á ný. Um daginn greindi sjúklingur, sem ég hef fylgst með og er búinn að fara þrisvar í meðferð til Indlands, frá því að hann væri farinn að finna fyrir virkni í blöðrunni. Bara það er stórsigur.“

Meðferðin tekur þrjú ár

Þuríður Harpa þarf að fara allt að níu sinnum til Indlands vegna meðferðarinnar sem tekur rúmlega þrjú ár. Miðað við gengi krónunnar í dag verður heildarkostnaðurinn allt að 30 milljónir króna, að sögn Þuríðar.

Samstarfsmenn hennar hafa hrundið af stað söfnun og nú hafa þegar safnast um 5,5 milljónir króna. Þar af söfnuðust um 2 milljónir á sérstöku styrktarkvöldi í reiðhöllinni á Sauðárkróki í síðustu viku.

Söfnunarreikningur er í Nýja Landsbankanum, 0161-15-550165, og í Sparisjóði Skagafjarðar, 1125-05-250067.

Í hnotskurn

» Þuríður Harpa Sigurðardóttir hryggbrotnaði og rifbeinsbrotnaði þegar hún datt af hestbaki auk þess sem mænan skaddaðist.
» Hún vonaðist til þess að fá einhverja hreyfigetu fyrir neðan brjóst en svo hefur enn ekki orðið.
» Þuríður Harpa fann upplýsingar á netinu um stofnfrumumeðferð indversks læknis sem fullyrt er að hafi borið góðan árangur.