Þessi áttu aðeins síðasta spölinn ófarinn úr Hlíðarkambi út í Reynihlíð, sögðu gönguna hafa verið skemmtilega þrátt fyrir norðan nepju í fangið síðari hluta leiðarinnar, ekki höfðu samt allir verið með alla leiðina. Birkir Fanndal

Um 120 manns tóku þátt í árlegri píslargöngu umhverfis Mývatn í dag en hefð hefur skapast í Mývatnssveit að fara í slíka göngu á föstudaginn langa. Um er að ræða 36 km vegalengd og luku fyrstu göngumenn göngunni upp úr hádegi.

Píslargangan hófst að venju á föstudagsmorgun við Hótel Reynihlið klukkan 9. Veðrið við Mývatn var þokkalega hagstætt göngufólki. Hæg norðan gola með vægu frosti og lágskýjuðu veðri. Þeir voru ríflega 120 sem lögðu af stað frá Reynihlið norður yfir hraun áleiðis í 36 km gönguna.  

Stundarfjórðungi fyrir göngu var stutt helgistund í Reykjahlíðarkirkju. Þar sungu þeir saman fornar morguntíðir sr. Þorgrímur á Grenjaðarstað og sr. Örnólfur á Skútustöðum. Þessi tíðasöngur er í útsetningu Róberts Abrahams Ottóssonar og nýtur sín afar vel í flutningi þeirra stéttarbræðra. Kirkjan fylltist af göngufólki meðan á flutningi þeirra stóð og viðstaddir fóru með bæn áður en snúið var aftur að hótelinu þaðan sem gangan hófst.

Séra Örnólfur fór síðan í Skútustaði þar sem hann las Passíusálma í kirkjunni fram eftir degi en Séra Þorgrímur hélt af stað í píslargönguna með öðru göngufólki svo sem hann hefur gert á þessum degi undanfarin ár. Gengið var rösklega veðri var þann veg háttað að ástæðulaust var að drolla mikið. Það sást líka er leið að lokum göngunnar að fólkið hafði haldið vel áfram. Um kl 16 höfðu allflestir skilað sér aftur að Hótel Reynihlíð. Að göngu lokinni héldu ferðalúnir og fótsárir svo upp í jarðböðin þar sem þreytan hverfur sem dögg fyrir sólu og allir eru ánægðir.