Náttúrustofa Austurlands ætlar að nota GPS-staðsetningartækni til að fylgjast með ferðum hreindýra. Nýtur stofnunin stuðnings Landsvirkjunar við verkefnið en það tengist skilyrðum fyrir leyfi til að reisa og reka Kárahnjúkavirkjum.

Samningur milli Landsvirkjunar og Náttúrustofu Austurlands um stuðning við nýtt verkefni í hreindýrarannsóknum var undirritaður 2. apríl. Í frétt Landsvirkjunar segir að með því að hengja GPS-staðsetningartæki á nokkur dýr sé að hægt að fylgjast með þeim frá degi til dags.

„Ávinningur og viðbót við núverandi rannsóknir eru t.d. upplýsingar um samgang á milli hjarða sem að jafnaði halda sig á mismunandi svæðum, þ.e. í Álftafirði og nágrenni og við Snæfell. Með þessari tækni munu dýrin vísa á þau svæði sem mest eru nýtt til beitar, þannig að betur megi gera sér grein fyrir beitarálagi.

Tækin munu ljósta upp um flakk dýranna, þ.e. hversu miklum tíma þau verja til ferða og hvíldar, sem er t.d. innlegg í þekkingu á orkubúskap þeirra. Tækin verða í gangi allt árið í u.þ.b. tvö og hálft ár, þannig að einnig munu fást upplýsingar um hegðun þeirra að vetrinum og þá m.a. hugsanlegan ágang þeirra á lönd bænda.

Samkvæmt skilyrðum fyrir leyfi til að reisa og reka Kárahnjúkavirkjun hafa Landsvirkjun og Náttúrustofu Austurlands verið að móta vöktunaráætlun til að fylgjast með áhrifum á hreindýrastofninn. Verkefnin eiga að vera til viðbótar við hefðbundna vöktun, og hafa fyrst og fremst beinst að burði og burðarsvæðum og auknu beitarálagi á sumarbeitarsvæðum Snæfellshjarðar.“ Hreindýravöktun Náttúrustofu Austurlands