„Það er spurning hvenær menn þora að gefa í, hvort það verður fyrst á Öxnadalsheiðinni. Þetta eru um 210 km á mann svo ef menn verða búnir að sprengja sig eftir 100 km getur afgangurinn orðið erfiður,“ segir Hákon Hrafn Sigurðsson, formaður hjólreiðanefndar ÍSÍ, um fyrstu hjólreiðakeppnina á milli Reykjavíkur og Akureyrar sem haldin verður í sumar.

Ætti að taka 12 klukkustundir

Keppnin verður haldin í tengslum við Landsmót UMFÍ á Akureyri og verða hjólreiðakapparnir ræstir í Reykjavík hinn 8. júlí, klukkan átta að morgni. „Þetta tekur líklega um 12 klukkustundir en það fer auðvitað eftir veðri. Það ætti þó að verða nokkuð auðvelt að halda um 32 km meðalhraða,“ segir Hákon.

Margir hafa þegar lýst yfir áhuga á þátttöku en að sögn Hákonar verður hámark á fjölda keppnisliða af öryggis- og skipulagsástæðum. „Það verða á milli 8 og 10 lið, sá yngsti sem hefur sýnt áhuga er 19 ára og sá elsti er 54 ára í hörkuformi,“ segir Hákon, sem sjálfur ætlar að taka þátt.

Keppt verður í tveggja manna liðum og mun bíll fylgja hverju liði. „Menn geta því báðir hjólað í einu og myndað skjól hvor fyrir annan eða hvílt sig inn á milli,“ segir Hákon.

Í hnotskurn

» Hjólað verður í tveggja manna liðum, um 420 km leið. Á svo löngum leiðum skiptir miklu að spara orku, t.d. með því að nýta skjól af öðrum keppendum.
» Auk hjólreiðakeppninnar verður m.a. efnt til fyrsta maraþonhlaupsins á Akureyri í tilefni af afmæli Landsmótsins.