Miðað við yfirlýsingu borgarstjóra og menntamálaráðherra frá í febrúar verður Tónlistar- og ráðstefnuhúsið við Reykjavíkurhöfn að standa undir sér, án þess að ríki eða borg leggi húsinu til aukafjármagn til rekstursins. Austurhöfn-TR ehf., sem sér um framkvæmdina, segir að rekstur hússins muni standa undir sér. Kostnaður við rekstur hússins nemur um 800 milljónum króna árlega, samkvæmt áætlun Austurhafnar.

35 ára greiðslur í einu lagi

Í upphaflegum samningi um Tónlistarhúsið var gert ráð fyrir árlegu 808 milljóna framlagi ríkis og borgar (á verðlagi í október 2008) í 35 ár. Þegar samið var um byggingu hússins gerðu ríki og borg ráð fyrir að um 20% af þessu framlagi rynni til að greiða hluta af rekstrarkostnaði, skv. upplýsingum frá Austurhöfn. Það var þó ekki á þeirra valdi hvernig peningunum yrði ráðstafað því framkvæmdin var í höndum einkafyrirtækis, Portus Group.

Eftir að Portus Group þraut örendið um svipað leyti og Landsbankann ákváðu ríki og borg að taka við keflinu. Til að hægt væri að ljúka við húsið var samið um að bankar veittu lán til húsbyggingarinnar gegn veði í fyrrnefndum greiðslum frá ríki og borg. Allt framlag opinberra aðila fer því til að reisa húsið en ekkert er afgangs til rekstursins. „Okkar áætlanir sýna að reksturinn muni standa undir sér og það þurfi ekki að koma til aukaframlag,“ segir Stefán Hermannsson, framkvæmdastjóri Austurhafnar. Nú sé gert ráð fyrir að Íslenska óperan og Íslenski dansflokkurinn fái inni í húsinu og þeirri starfsemi fylgi tekjur. Þá fái húsið tekjur af sýningaraðstöðu og fleiru sem Portus bætti við húsið. „Þá er reksturinn á sléttu,“ segir Stefán.

Upphaflega var gert ráð fyrir að Tónlistarhúsið kostaði 12 milljarða (október 2004), sem jafngildir um 18 milljörðum á núverandi verðlagi. Nú er gert ráð fyrir að það kosti 23 milljarða. Stefán Hermannsson, framkvæmdastjóri Austurhafnar, segir að þó að ljóst sé að húsið verði mun dýrara en upphaflega stóð til muni sá aukakostnaður ekki falla á ríki og borg því um sé að ræða fjármagn sem Portus Group lagði í húsið. Aukinn kostnaður skýrist m.a. af því að Portus ákvað að stækka húsið úr 23.000 m² í 28.000 m². Portus ætlaði einnig að leggja til konsertorgel en eftir að ríki og borg tóku verkefnið yfir var ákveðið að hætta við þau kaup.

Sameinaðir stjórnmálamenn

Katrín Jakobsdóttir menntamálaráðherra segir að ekki sé gert ráð fyrir aukaframlögum heldur sé unnið að því að auka starfsemi í húsinu og fá þannig aukið rekstrarfé. Þegar ákveðið hafi verið að reisa húsið hafi legið fyrir rekstraráætlun sem nú yrði að endurskoða. Síðan þurfi að fá einhvern til samstarfs um rekstur hússins. Það hefði verið dýrara að bíða með framkvæmdir og það væri ekki góð nýting á fjármunum að láta húsið skemmast. „Við fáum þetta bara í fangið, þetta verkefni,“ sagði hún.

Þegar ákveðið var að reisa húsið voru Sjálfstæðisflokkur og Framsóknarflokkur í ríkisstjórn. Reykjavíkurlistinn (Samfylking, Vinstri-græn og Framsóknarflokkurinn) var við völd í borginni.

Fleiri komast fyrir

Stóri salurinn í Tónlistar- og ráðstefnuhúsinu getur rúmað allt að 1.800 manns í sætum. Þetta eru töluvert fleiri en rúmast í mörgum norrænum tónlistarhúsum. Aðalsalurinn í Grieghöllinni í Bergen rúmar 1.500 manns.
Aðalsalur Óperunnar í Kaupmannahöfn tekur 1.400 í sæti. Aðalsalurinn í nýjum höfuðstöðvum Danska ríkisútvarpsins tekur 1.800 í sæti auk 225 í kórstæði.

Upphaflega var gert ráð fyrir að salurinn í Tónlistarhúsinu í Reykjavík tæki um 1.500 í sæti en eftir viðræður við tónleikahaldara og fleiri var talið fjárhagslegra hagkvæmara að hafa salinn stærri, m.a. til að skjóta styrkari fjárhagslegum stoðum undir tónleika með frægum hljómsveitum og einleikurum.

Í salnum eru 800 sæti, álíka margir á svölum og þá er hægt að hafa 200 sæti á bak við sviðið.