Aðgerðir lögreglu við Vatnsstíg 4 í síðustu viku. mbl.is/Júlíus

Torfusamtökin gera athugasemd við vinnulag lögreglunnar við handtöku 
hústökufólks við Vatnsstíg í sl. viku. Í yfirlýsingu samtakanna segir að það veki furðu að slíkri hörku skuli beitt gagnvart aðgerðum hóps sem 
hafði það eitt að markmiði að benda á leiðir til bæta umhverfi og 
samfélag í miðbænum, með því að vekja athygli á nýtingarmöguleikum 
þeirra fjölmörgu eldri húsa í miðbænum sem standa auð og liggja undir 
skemmdum vegna sinnuleysis eigenda sinna.

Torfusamtökin segja að hliðstæðri hörku hafi að jafnaði ekki verið beitt gagnvart ógæfumönnum sem í lengri eða skemmri tíma hafi tekið sér bólfestu í auðum húsum, enda þótt bæði nágrönnum og húseignunum sjálfum stafi mun meiri ógn af slíkum gestum.

„Skipulagsmál í eldri hverfum eru vandmeðfarin og þar takast á ólíkir hagsmunir. Sjónarmið um varðveislu menningarminja og eflingu jákvæðs mannlífs í miðbænum fara ekki alltaf saman við fjárhagslega hagsmuni þeirra sem auðu húsin eiga. Þeir hafa  í mörgum tilvikum ótvíræðan hag af hrörnun þeirra, niðurrifi og nýrri uppbyggingu á lóðunum í kjölfarið. Víða í nálægum löndum er slík háttsemi húseigenda refsiverð. Frá sjónarhóli meðalhófs og jafnræðis verður lögreglan að huga að því hverra hagsmuna hún er að gæta í tilvikum sem þessum,“ segir í yfirlýsingu Torfusamtakanna.

Þá segir að ekki sé  komin formleg niðurrifsheimild fyrir þetta 
tiltekna hús við Vatnsstíg, en allar ákvarðanir um breytingar eða 
niðurrif á húsum sem byggð eru fyrir 1918 falli undir lög um húsafriðun.

Torfusamtökin beina þeim tilmælum til lögreglunar að hún gæti að húsum sem hafa minjagildi og standi svo að málum að aðgerðir hennar valdi ekki tjóni á sögulegum minjum.