Á útreiðum í Víðidal. mbl.is/Kristinn

Ákveðið hefur verið að endurskoða umdeilt deiliskipulag Víðidals við Elliðaár þar sem gert er ráð fyrir uppbyggingu Hestamannafélagsins Fáks. Tillaga þessa efnis var samþykkt á fundi skipulagsráðs Reykjavíkur í dag.

Fram kom á fundinum, að Hestamannafélagið Fákur hafi sent skipulagsyfirvöldum bréf í tölvupósti þar sem segi að í ljósi athugasemda og þeirra umræðu sem orðið hafi um uppbyggingarheimildir í deiliskipulagi fyrir athafnasvæði Fáks í Víðidal vilji stjórn félagsins koma á framfæri vilja sínum til viðræðna við skipulagsyfirvöld í Reykjavík með það að markmiði að endurskoða tillöguna til að koma enn frekar til móts við þau sjónarmið sem fram hafa komið frá hagsmunaaðilum og með því freista þess að ná sátt um nýtingu svæðisins í þágu hestamennsku.

Júlíus Vífill Ingvarsson, formaður skipulagsráðs, hefur ásamt embættismönnum skipulagssviðs, fundað með formanni Fáks, framkvæmdastjóra og formanni Stangaveiðifélags Reykjavíkur og veiðimálastjóra ásamt sérfræðingum Veiðimálastofnunar.

Í tillögunni, sem Júlíus Vífill bar fram á fundi skipulagsráðs í dag, er lagt til að bréfi Fáks verði vísað til skipulagsstjóra og honum falið að gera tillögu að endurskoðuðu deiliskipulagi Víðidalsins til að koma enn frekar til móts við þau sjónarmið sem fram hafa komið frá hagsmunaaðilum og freista þess að ná sátt um nýtingu svæðisins.