Gylfi Magnússon, viðskiptaráðherra, segir að þó að ef til vill sé ekki of seint að breyta áformum um endurskipulagningu bankanna þannig að ríkið kaupi aðeins innistæðurnar, líkt og Jón G. Jónsson lagði til í grein í Morgunblaðinu í gær, sé slík breyting ólíkleg. Unnið hafi verið eftir öðru viðmiði frá því í haust og rætt við lánardrottna og fleiri í samræmi við það. Það gæti verið erfitt og tímafrekt að fá erlenda kröfuhafa til að sætta sig við slíka breytingu sem jafngilti 90° beygju eða jafnvel U-beygju.

„Mér finnst frekar ólíklegt að þetta verði gert en það bíður nú reyndar nýrrar ríkisstjórnar að ákveða það.“

Í greininni varar Jón mjög við afleiðingum þess að endurreistir bankar verði of stórir.

„Ég er ekki viss um að það fari illa þó að ríkið eignist hlut í bönkunum eins og stefnt hefur verið að undanfarna mánuði. Það hefur verið lögð mikil vinna í að meta eignirnar og það mat virðist vera skynsamlegt þannig að ef rétt er að málum staðið, ættu bankarnir að vera með sæmilega heilbrigðan efnahagsreikning og þess vegna gæti ríkið lagt þeim til fé, án þess að stór hluti þess tapist,“ sagði Gylfi. Hann tók fram að grein Jóns væri góð og hann væri sammála mörgu sem þar kæmi fram, þó ekki öllu.

Gylfi benti á að ef bankarnir yrðu mjög litlir yrðu þeir veigaminni og ættu erfiðara með að þjónusta íslenskt atvinnulíf sem hefði ekki aðgang að erlendu fjármagni. Raunar væri á mörkunum að þeir væru nógu stórir til að sinna bankaþjónustu við stærstu fyrirtæki landsins.