Eftir Grétar Júníus Guðmundsson gretar@mbl.is

Ástæðuna fyrir slæmri útkomu Frjálslynda flokksins í alþingiskosningunum síðastliðinn laugardag má að stærstum hluta rekja til beinna persónulegra deilna milli manna í flokknum, að sögn Guðjóns Arnars Kristjánssonar, formanns flokksins. Hann segir að þessar deilur hafi sett mark sitt á Frjálslynda flokkinn í langan tíma og spillt gríðarlega mikið fyrir öllu starfi innan hans.

Frjálslyndi flokkurinn fékk 2,2% atkvæða í þingkosningunum og engan mann kjörinn. Í kosningunum fyrir tveimur árum fékk flokkurinn 7,3% atkvæða og fjóra menn.

Í annan stað segir Guðjón Arnar að það hafi haft sín áhrif á fylgi Frjálslynda flokksins, að Samfylkingin og Vinstrihreyfingin – grænt framboð hafi tekið upp helsta baráttumál flokksins í fiskveiðistjórnunarmálum.

„Fólk virðist hafa trúað því að það væru meiri líkur á því að flokkarnir tveir myndu eiga möguleika á því að koma fram breytingum á fiskveiðistjórnunarkerfinu en Frjálslyndi flokkurinn, sem hefur haft þessi mál efst á sinni stefnuskrá,“ segir Guðjón Arnar. „Þar hafði án efa áhrif sú staðreynd að Frjálslyndi flokkurinn var ekki að fá góða útkomu úr skoðanakönnunum. Persónulegu árásirnar sem gengu á milli manna í flokknum hafa þar vegið þungt.“

Guðjón Arnar segir að deilurnar innan Frjálslynda flokksins hafi hafist fljótlega eftir að Nýtt afl gekk til liðs við flokkinn á sínum tíma. Jón Magnússon, sem síðar gekk til liðs við Sjálfstæðisflokkinn, og Kristinn H. Gunnarsson, sem einnig gekk úr röðum Frjálslynda flokksins fyrir nokkru, hafi deilt hart sín á milli og það hafi haft mjög neikvæð áhrif. „Þá hafa ýmsir aðrir innan flokksins haldið uppi hörðum árásum á forystu hans með ótrúlegum hætti.“