Hanna Birna ásamt Joe Biden og Richard M. Daley, borgarstjóra Chicago.

Hanna Birna Kristjánsdóttir, borgarstjóri, og Óskar Bergsson, formaður borgarráðs, sátu í vikunni ráðstefnu í Chicago um lausnir borga vegna efnahagsvandans. Joe Biden, varaforseti Bandaríkjanna, var aðalræðumaður ráðstefnunnar en Hanna Birna flutti þar tvö erindi.

Samkvæmt upplýsingum frá skrifstofu borgarstjóra, að Richard M. Daley, borgarstjóra Chicago, bauð Hönnu Birnu að taka þátt í ráðstefnunni. Hafi Carol van Voorst, fráfarandi sendiherra Bandaríkjanna á Íslandi lagt ríka áherslu á þátttöku Reykjavíkurborgar á ráðstefnunni.

Auk borgarstjóra Chicago sitja ráðstefnuna borgarstjórar og fulltrúar þeirra víða að úr heiminum, m.a. frá París, Moskvu, Helsinki, Hamborg, Glasgow, Vilnius, Prag og Aþenu.

Hanna Birna Kristjánsdóttir borgarstjóri var beðin um að segja frá aðgerðum og árangri Reykjavíkurborgar við að glíma við efnahagsástandið og eins að flytja erindi um árangur og sýn borgarinnar í umhverfismálum.
Hún flutti erindi á mánudag þar sem hún sagði því hvaða áhrif efnahagsþrengingarnar á Íslandi hefðu haft á starfsemi Reykjavíkurborgar og hvernig borgin hefði brugðist við. 

Hanna Birna lagði sérstaka áherslu á að þau verkefni sem borgir heimsins stæðu frammi fyrir nú yrðu ekki leyst af einum stjórnmálamanni, einum flokki eða einum meirihluta heldur fælust lausnirnar í aukinni samvinnu og þátttöku sem flestra.  Hefðbundin átök yrðu að víkja fyrir nýjum leiðum og nýjum aðferðum, bæði í viðskiptum og stjórnmálum.

Í gær flutti Hanna Birna erindi á ráðstefnunni um borgarskipulag og sjálfbæra þróun í Reykjavík. Þar kynnti hún sérstaklega grænu skrefin sem tekin hafa verið í Reykjavík og þann árangur sem Íslendingar hafa náð við virkjun jarðvarma.