„Undirritaður Hitchem Mansrí, f. 16.12. 1976, staðfestir hér með að ef ég verð meðvitundarlaus í hungurverkfallinu þá hafna ég allri læknisaðstoð.“ Þessar línur koma úr bréfi sem Félagsþjónusta Reykjanesbæjar kom með til Alsírbúans Hitchem Mansrí á þriðjudag. Bréfið geymir einnig lýsingu á áhrifum hungurverkfalls á líkamann.

Mansrí hefur í dag sinn áttunda dag í hungurverkfalli en hann hefur beðið í tæp tvö ár hér á landi eftir að hafa óskað eftir flóttamannahæli. „Ég ætla ekki að gefast upp,“ sagði Mansrí þegar Morgunblaðið hafði samband við hann. Hann hefur ekki undirritað yfirlýsinguna en bar sig ekki vel.

Hera Ósk Einarsdóttir, félagsráðgjafi hjá Félagsþjónustu Reykjarnesbæjar, segir um staðlað bréf að ræða. Hælisleitendur eigi sjálfstæðan rétt á að vera í hungurverkfalli. Þeim sé hins vegar alltaf gerð grein fyrir alvöru þessa valkostar og stofnunin verði að hafa í höndum staðfestingu óski fólk ekki aðstoðar. Hún hafnar því að með þessu séu félagsmálayfirvöld að þvo hendur sínar af málinu.

Hún segir vel fylgst með Mansrí, bæði af hálfu Rauða krossins og Félagsmálastofnunar, sem kallar alltaf til lækni á ákveðnum tímapunkti í hungurverkfalli. Farið hafi verið yfir málið með Mansrí í gær og hann látinn taka bréfið með sér, í stað þess að undirrita það á staðnum, til að tryggja að hann skildi fyllilega innihald þess.

Um fimm einstaklingar hafa farið í hungurverkfall í vetur og skrifaði enginn þeirra undir yfirlýsinguna um að hafna læknisaðstoð.