Heilsugæslustöð í Reykjavík. mbl.is

Reiknað er með, að heilsugæslulæknar á höfuðborgarsvæðinu hætti almennt að taka á móti sjúklingum klukkan 15 á daginn frá og með 1. maí en þá koma til framkvæmda sparnaðarráðstafanir yfirstjórnar Heilsugæslunnar á höfuðborgarsvæðinu. Á öllum heilsugæslustöðvum borgarinnar verður þó áfram síðdegisvakt frá klukkan 16 til 18 og neyðartilvikum, sem koma upp að deginum, verður sinnt eins og áður.

Læknaráð heilsugæslulækna á höfuðborgarsvæðinu sendi frá sér tilkynningu í morgun þar sem bent var á að þjónusta heilsugæslunnar muni skerðast vegna minnkaðs tímaframboðs hjá heilsugæslulæknum. Eru í tilkynningunni hörmuð þau óþægindi, sem þetta kunni að valda skjólstæðingum heilsugæslunnar.

Að sögn Baldurs P. Thorstensen, formanns læknaráðsins, felst í sparnaðaráastöfnunum, að ýmsum sérkjörum lækna var sagt upp, þar á meðal fastri yfirvinnu. Þetta hafi í för með sér, að læknar verði nú að hætta móttöku fyrr á daginn til að geta lokið skýrsluvinnu í dagvinnutíma.

Spara á um 370 milljónir króna með þeim ráðstöfnunum, sem gripið verður til í heilsugæslunni um mánaðamótin. Er m.a. gert ráð fyrir að laun starfsmanna sem hafa yfir 300 þúsund krónur á mánuði, skerðist um 6-10%. Baldur sagði, að um helmingur þeirrar upphæðar sem á að sparast, eða 168 milljónir, komi niður á læknum, enda séu þeir launahæsti hópurinn. Áætla megi, að laun læknanna skerðist að jafnaði um 12-14%. Um 130 stöðugildi læknastarfa eru hjá Heilsugæslu höfuðborgarsvæðisins.

Þegar Baldur var spurður hvort komið hafi til greina að læknar tækju á sig skerðinguna tímabundið án þess að draga úr vinnuframlagi svaraði hann, að læknar eins og aðrir tækju á sig kjaraskerðingu. Hins vegar hefði lítið sem ekkert samráð verið haft við þá varðandi þessar ráðstafanir.

Baldur sagði, að áhrif þeirrar þjónustuskerðingar, sem nú er yfirvofandi, verði væntanlega þau að fólk muni í auknum mæli leita til dýrari þjónustu, svo sem á læknavaktir eða til sérfræðinga þar sem biðtími hjá  heimilislæknum muni lengjast. Læknar hafi lagt áherslu á að verja eigi grunnþjónustuna en ekki hafi verið tekið tillit til þess.