Hæstiréttur staðfesti gæsluvarðhald
Hæstiréttur Íslands. mbl.is/Brynjar Gauti
Hæstiréttur hefur staðfest gæsluvarðhalds úrskurð yfir karlmanni sem ásamt öðrum ruddist inn á heimili eldri hjóna á Arnarnesi. Maðurinn sem hefur játað aðild sína sætir varðhaldi allt til 19. maí nk.
Í úrskurði héraðsdóms er vitnað orðrétt í ummæli hjónanna þegar þau gáfu skýrslu um málið. Konan sagðist hafa verið heima að fylgjast með kosningasjónvarpinu ásamt eiginmanni sínum þegar barið var á útidyrahurð. Konan opnaði hurðina og þá ruddust tveir menn inn. Annar tók fyrir vit hennar og snéri hana niður í gólfið og skipaði henni að liggja kyrri en ella færi illa fyrir henni. Hún sagðist hafa hrópað af hræðslu og þá hafi maðurinn sagt: „Ég bara rota hana.”
Í kjölfarið fékk konan þrjú þung högg í höfuðið. Maðurinn skipaði henni að losa hringa af fingrum sér og hún sagðist ekki hafa þorað annað en að hlýða. Sagði hún þau hjónin hafa verið undir stöðugum hótunum um líflát á meðan ráninu stóð, þ.e. að þau yrðu stungin ef þau ekki hlýddu.
Eiginmaðurinn sagði að bankað hefði verið á útidyrahurðina og kona hans fór fram. Hann heyrði síðan tvö óp og stuttu síðar kom maður, sem hafði hlið andlit sitt að hluta, vopnaður flökunarhníf með um 18 cm löngu hnífsblaði. Maðurinn sagði: „Við viljum peningaskápinn, við erum komnir til að taka peningana þína. Persónulega hef ég engu að tapa og ef þú gerir ekki allt sem ég segi þá sting ég þig.”
Árásarmaðurinn lagði hnífinn að brjóstkassa húsráðandans og fylgdi honum þannig upp á jarðhæð og skipaði honum að leggjast niður við hlið konu sinnar. Hafi annar ræningjanna gætt þeirra, þar sem þau lágu, á meðan hinn fór ránshendi um heimilið. Tóku mennirnir m.a. seðlaveski með um 50.000 krónum, gsm síma, tölvu og skartgripi.
Í greinargerð lögreglustjórans á höfuðborgarsvæðinu segir að brot mannsins sé svo svívirðilegt að það myndi valda hneykslan í samfélaginu og særa réttarvitund almennings fái hann að ganga frjáls á meðan mál hans er til meðferðar hjá dómstólum.
Í skýrslutöku hjá lögreglu kom fram að maðurinn hafi ásamt öðrum og tveimur stúlkum komið að heimili hjónanna. Stúlkurnar hafi beðið í bílnum á meðan mennirnir ruddust inn. Þeir voru vopnaðir hníf og hótuðu að stinga hjónin ef þau bentu ekki á fjármuni sína. Maðurinn hafi þá staðið yfir hjónunum á meðan hinn leitaði að verðmætum í húsinu. Þeir skiptu svo verðmætunum á milli sín.
Mennirnir eiga yfir höfði sér allt að sextán ára fangelsi.
