Hanna Birna Kristjánsdóttir, borgarstjóri. Rax / Ragnar Axelsson

Borgarstjórn Reykjavíkur ákvað á fundi sínum í dag að hefja vinnu við að móta áherslur í alþjóðasamskiptum vegna nýrra aðstæðna í efnahagsumhverfinu.  Í sameiginlegri bókun borgarfulltrúa Framsóknarflokks, Samfylkingar, Sjálfstæðisflokks og Vinstri grænna segir að borgarfulltrúarnir séu sammála um mikilvægi þess, að við þær aðstæður sem nú eru í íslensku samfélagi, sé nauðsynlegt að borgaryfirvöld taki virkan þátt í alþjóðasamstarfi sem nýst geti höfuðborginni til nýrrar sóknar.

Eini borgarfulltrúinn sem ekki skrifar undir þessa sameiginlegu bókun er Ólafur F. Magnússon, F-lista. Á síðasta fundi borgarráðs, 21. apríl síðastliðinn, gagnrýndi hann harðlega ferðakostnað borgarfulltrúa Framsóknarflokksins. Tók hann þá meðal annars fram að ferðakostnaður hjá þeim flokki hefði verið um 1,8 milljónir á árinu 2007.

Allir aðrir borgarfulltrúar eru sammála um að tækifærin í alþjóðasamstarfi geti legið víða, en nú þegar fjármagn sé takmarkað verði forgangsraðað í þágu ákveðinna verkefna í alþjóðlegu samstarfi. Þau verkefni geti „til dæmis verið: Fjárhagslegar og félagslegar lausnir við efnahagsvandanum. Mikilvægar íslenskar umhverfisáherslur. Aðgerðir til að gera Reykjavík að enn betri ferðamannaborg,“ eins og segir í tilkynningu frá Reykjavíkurborg.

Til að móta þessar áherslur enn frekar mun borgarráð skipa vinnuhóp fimm borgarfulltrúa, undir forystu borgarstjóra,  sem skilar tillögum til borgarráðs eigi síðar en 1. ágúst næstkomandi.