Katrín Jakobsdóttir menntamálaráðherra mun taka að sér kennslu við Háskóla unga fólksins, sem starfræktur verður 8.-12. júní næstkomandi. Segir í tilkynningu frá Háskóla unga fólksins að kennarar þar séu þaulvanir háskólakennarar, fræðimenn og meistara- og doktorsnemar. Sigurður Guðmundsson, forseti Heilbrigðisvísindasviðs HÍ og fyrrverandi landlæknir mun einnig kenna.
Börnum og unglingum, fæddum 1993-1997, gefstu kostur á því að sækja Háskóla unga fólksins og fá snemmbúna innsýn í vísinda- og fræðasamfélagið.
Skráning nemenda í Háskóla unga fólksins stendur til 29. maí og fer fram á vef Háskóla unga fólksins, www.ung.is. Skráningargjald er 15 þúsund krónur og innifalið í því eru námskeið, kennslugögn og léttur hádegisverður alla skóladagana.
Í tilkynningunni segir að gríðarleg aðsókn hafi verið í Háskóla unga fólksins undanfarin ár, en þetta er í sjötta sinn sem skólinn er starfræktur. Gert er ráð fyrir metþátttöku þar sem boðið er upp á fleiri námskeið en áður. Hver nemandi velur sex námskeið og einn þemadag og setur þannig saman sína eigin stundatöflu. Í boði verða mörg stutt en hnitmiðuð námskeið úr öllum fræðasviðum Háskóla Íslands þannig að allir geti fundið eitthvað við sitt hæfi.