Héraðsdómur Reykjaness. mbl.is/ÞÖK

Héraðsdómur Reykjaness hefur dæmt karlmann á þrítugsaldri í hálfs árs skilorðsbundið fangelsi fyrir tvær líkamsárásir, þar af aðra sérlega hættulega. Maðurinn var dæmdur til að greiða öðru fórnarlambinu 150 þúsund í bætur og rúmar 400 þúsund krónur í málskostnað.

Maðurinn var ákærður fyrir að ráðast á annan mann í júní í fyrra á Ráðhústorginu á Akureyri og slá hann í andlitið með þeim afleiðingum að hann nefbrotnaði. Þá sló hann konu í höfuðið með flösku eða glasi á veitingastað í Reykjanesbæ í desember á síðasta ári. Konan fékk 8 sm skurð á hðfuðið. 

Maðurinn játaði árásina í Reykjanesbæ en viðurkenndi ekki að hafa slegið manninn á Ráðhústorginu vísvitandi. Sagðist hann hafa ætlað að heilsa hálfbróður sínum með því að rétta út höndina með krepptum hnefa en það sé siður hjá þeim að heilsast með þeim hætti. Á sama tíma hafi hann rekist á manninn sem hann nefbraut.

Dómarinn segir í niðurstöðu sinni, að þótt frásögn sakborningsins, um að hann hafi ætlað að heilsa bróður sínum með sérstökum hætti, hefði með sér nokkurn ólíkindablæ væri ekki unnt að slá því föstu að hnefahöggið hafi verið af ásetningi. Maðurinn var því sakfelldur fyrir líkamsárás af gáleysi.