Úr myndasafni. mbl.is/Kristinn

Lögreglan á höfuðborgarsvæðinu hefur yfirheyrt nokkra menn í tengslum við kannabisræktun á sveitabæ í Berufirði, sem lögreglan á Eskifirði stöðvaði í gær. Jónas Wilhelmsson, yfirlögregluþjónn á Eskifirði, telur að einhverjir þeirra hafi réttarstöðu sakborninga, en nákvæmur fjöldi liggur ekki fyrir að svo stöddu.

Hann segir að miðað við umfang og uppsetningu hafi það verið ætlunin  að setja af stað stóra og afkastamikla ræktun. „Það var byrjuð þarna svokölluð forræktun,“ segir hann í samtali við mbl.is. Ekki hafi mikið magn af kannabis fundist á staðnum.

„Við erum búnir að vita af þessu í dálítinn tíma,“ segir Jónas. Spurður út í það hvers vegna lögregla lét til skarar skríða í gær segir hann að það hafi einfaldlega verið orðið tímabært. Enginn var á staðnum þegar lögreglu bar að garði og er nú búið að loka verksmiðjunni, sem hafði aldrei tekið formlega til starfa. Ekki liggur fyrir hvenær henni var komið upp, en talið er að hún sé nokkurra mánaða gömul.

Fram hefur komið í fjölmiðlum að framleiðslunni hafi verið fjarstýrt með fullkomnum tölvubúnaði. Jónas segir að það sé ekki rétt. Þá tekur Jónas fram að eigendur sveitabæjarins tengist málinu ekki á nokkurn hátt. 

Málið, sem er á forræði lögreglunnar á Eskifirði, er unnið í samvinnu við fíkniefnadeild lögreglunnar á höfuðborgarsvæðinu.