Fjármálaráðuneytið hefur í dag gefið út reglugerðir um endurgreiðslu virðisaukaskatts af vinnu manna við íbúðarhúsnæði o.fl. Hægt er tímabundið að fá endurgreiddan virðisaukaskatt af vinnu við íbúðahúsnæði að fullu í stað 60% áður. Lög þar að lútandi voru samþykkt á Alþingi í byrjun mars en þrátt fyrir tafir á útgáfu reglugerðar er þegar byrjað að endurgreiða slíkan virðisaukaskatt. Hefur slíkum beiðnum fjölgað að undanförnu hjá skattstjórum.

Annars vegar er um að ræða reglugerð um tímabundna aukna endurgreiðslu virðisaukaskatts af vinnu manna við tiltekið húsnæði. Sú reglugerð er sett með vísan til laga sem samþykkt voru á Alþingi í byrjun mars um að endurgreiðsla virðisaukaskatts af vinnu við íbúðarhúsnæði skuli nema 100% í stað 60% af vinnu sem fram fer á tímabilinu 1. mars 2009 til 1. janúar 2011. Samkvæmt lögunum nær þessi heimild jafnframt til vinnu við frístundahúsnæði og húsnæði í eigu sveitarfélaga.

„Markmiðið með breytingunum er að hvetja til aukinnar starfsemi á byggingarmarkaði samhliða því að koma til móts við húsbyggjendur sem eiga í erfiðleikum vegna yfirstandandi efnahagsþrenginga. Með reglugerðinni er kveðið nánar á um framkvæmd endurgreiðslunnar, m.a. með nánari afmörkun á frístundahúsnæði og húsnæði sem er alfarið í eigu sveitarfélaga, en undir það síðarnefnda fellur t.d. skrifstofuhúsnæði, íþróttahús, áhaldahús o.fl. Þrátt fyrir tafir á útgáfu reglugerðarinnar er endurgreiðsla virðisaukaskatt á grundvelli lagabreytingarinnar sem tók gildi 1. mars þegar hafin og er nú þegar komin fram merkjanleg aukning í umræddum endurgreiðslubeiðnum hjá skattstjórum," að því er segir í tilkynningu.

Hins vegar eru breytingar á reglugerð nr. 449/1990, um endurgreiðslu virðisaukaskatts af vinnu manna við íbúðarhúsnæði, en þar er m.a. mælt fyrir um endurgreiðslu ákveðins hlutfalls virðisaukaskatts af verksmiðjuframleiddum húseiningum til viðbótar við verksmiðjuframleidd íbúðarhús.

Sú þróun hefur átt sér stað á undanförnum árum að bygging íbúðarhúsnæðis fer í auknum mæli fram annars staðar en á eiginlegum byggingarstað og er breytingin gerð til þess að koma á jafnræði milli byggingaraðferða, samkvæmt tilkynningu.