Ætlað að auka framboð norrænna mynda
Ólafur Darri Ólafsson og Þröstur Leó Gunnarsson í hlutverkum sínum í Brúðguma Baltasars Kormáks. mbl.is/úr Brúðgumanum
Norræni kvikmynda- og sjónvarpssjóðurinn (Nordisk Film & TV Fond) mun 1. júlí nk. koma á fót nýju styrkja- og hvatakerfi, undir nafninu Nordic High Five, sem ætlað er að auka framboð og markaðshlutdeild norrænna kvikmynda í kvikmyndahúsum Norðurlandanna, auðvelda dreifingu þeirra á Norðurlöndunum og bæta rekstrarumhverfi rétthafa og dreifingaraðila norrænna mynda. Þetta kemur fram í fréttatilkynningu frá Norræna kvikmynda- og sjónvarssjóðnum.
Þar er bent á að á undanförnum árum hafi kvikmyndamarkaðurinn gert útgáfu á norrænum myndum æ erfiðari á Norðurlöndunum. Sjóðurinn hafi nú fundið leið til að sporna við þessari þróun.
Nordic High Five býður upp á styrki sem er beinlínis ætlað til dreifingar á „erlendum“ norrænum kvikmyndum til kvikmyndahúsa á Norðurlöndunum. Það mun jafnframt þýða að fleiri norrænar kvikmyndir verða gefnar út á DVD diskum, á VOD leigum og sýndar í sjónvarpi viðkomandi landa.
Nordic High Five er til að byrja með þriggja ára áætlun og eftir tvö ár verður lagt mat á þann árangur sem náðst hefur. Þeir fimm dreifingaraðilar sem hafa verið valdir til verkefnisins eru Camera Film í Danmörku, BioRex í Finnlandi, Græna ljósið á Íslandi, Arthaus í Noregi og NonStop í Svíþjóð.
„Allir þessir dreifingaraðilar sérhæfa sig í listrænni kvikmyndum og búa því yfir sérþekkingu í að dreifa minni gæðamyndum. Í dreifingu slíkra mynda þarf oft að fara ótroðnar slóðir og leggja á sig mikla vinnu þó að tekjumöguleikunum hætti til að vera minni. Þrátt fyrir listrænt gildi og gæði myndanna er ólíklegt að stærri dreifingarfyrirtækin sýni þeim áhuga. Dreifingaraðilarnir sem hafa orðið fyrir valinu eru allir frekar litlir á sínum heimamarkaði og deila með sér áhuga og metnaði fyrir að kynna norræna kvikmyndagerð,“ segir m.a. í tilkynningunni.
Rifjað er upp að fyrirtækin hafi öll unnið saman við kynningu og sýningar á myndum sem kepptu um Kvikmyndaverðlaun Norðurlandaráðs árið 2008 og munu halda því samstarfi áfram á þessu ári.
Fyrstu kvikmyndirnar sem dreift verður undir hatti Nordic High Five eru sænska myndin De Ufrivillige eftir Ruben Østlund í Danmörku, sænska myndin Kenny Starfighter eftir Calle Åstrand og Mats Lindberg í Finnlandi, danska myndin Valhalla Rising eftir Nicolas Winding Refn á Íslandi, finnska myndin Letters to Pastor Jacob eftir Klaus Härö í Noregi og íslenska myndin Brúðguminn eftir Baltasar Kormák í Svíþjóð.
