Í Laugarnesskóla mbl.is/Jim Smart

eftir Björn Jóhann Björnsson bjb@mbl.is

Menntasvið Reykjavíkur er farið að fá í hendur rekstraráætlanir frá stjórnendum grunnskólanna vegna næsta skólaárs. Að sögn Jóns Inga Einarssonar, fjármálastjóra menntasviðs, eru þær áætlanir innan fjárheimilda en að jafnaði munu útgjöld til grunnskólanna 36 dragast saman um 7%.

Í heild gæti þetta numið um 740 milljónum króna, þar af er 141 milljón vegna fækkunar nemenda umfram áætlanir. Kennslutengdir þættir eru skornir niður um 5,5%.

Jón Ingi sendi nýverið út bréf til allra skólastjóra í borginni þar sem fjallað er um fjárhagsáætlunina og hvaða leiðir eru færar til að draga úr útgjöldum. Þar eru m.a. settar fram hugmyndir í 19 liðum, sem eru afrakstur vinnuhópa úr öllum hverfum Reykjavíkur, sem skólastjórar skipuðu í. Heildarfjárhæð úr þeim hugmyndum, sem birtar eru í töflu hér til hliðar, er sparnaður upp á nærri 203 milljónir króna. Að sögn Jóns Inga er hugmyndunum ætlað að megninu til að vera leiðbeinandi fyrir skólastjórana, þar sem aðstæður geti verið mjög mismunandi í hverjum skóla fyrir sig. Hins vegar á það við um alla skólana að þeir munu taka út þá viðbótarkennslustund sem fyrir nokkrum árum var sett inn hjá 2.-4. bekk grunnskóla.

Skólastjórnendur eru ekki í öfundsverðu hlutverki við þessar erfiðu aðstæður. Borgaryfirvöld hafa lýst því yfir að fastráðnum borgarstarfsmönnum verði ekki sagt upp en lausráðið starfsfólk og leiðbeinendur fá ekki endurráðningu í mörgum tilvikum. Dregið verður úr yfirvinnu og margs konar kostnaður í rekstrinum skorinn niður. Til þessa aðhalds var þegar gripið í vetur, að stórum hluta, en hætt er við að sparnaðurinn þurfi að vera enn meiri næsta skólaár. Samtök skólastjóra, kennara og foreldra hafa öll lýst áhyggjum sínum af áhrifum niðurskurðarins á skólastarfið.