Mansri Hichem Kristinn Ingvarsson

Hælisleitandinn Mansri Hichem, sem verið hefur verið í hungurverkfalli síðustu þrjár vikur, var sendur heim í gærkvöldi að lokinni læknisskoðun  á Heilbrigðisstofnun Suðurnesja.

Í samtali við mbl.is segir Linda Magnúsdóttir, sjúkraliði sem fylgst hefur ástandi Hichem, að hann hafi hvorki viljað þiggja næringu í æð né saltvatnsupplausn og því hafi hann verið útskrifaður.

Að sögn Lindu heyrði hún í Hichem í morgun og þá hefði hann tjáð henni  að hann hefði náð að sofa smávegis í nótt. „Hann á hins vegar orðið mjög erfitt með svefn vegna verkja bæði fyrir brjósti og í maga,“ segir Linda. 

Aðspurð segir hún Hichem staðráðinn í því að halda áfram hungurverkfalli sínu þar til niðurstaða í máli hans fáist hjá dómsmálaráðherra. „Hann er búinn að bíða svo lengi eftir úrlausn sinna mála að hann er í raun búinn að gefa upp alla von. Hann segir að líf sitt muni engu máli skipta verði hann sendur til baka til heimalands síns, þ.e. Alsírs. Þá vill hann frekar deyja hér,“ segir Linda. 

Að sögn Linda hefur hungurverkfall Hichem haft áhrif á aðra þá hælisleitendur sem á Fit búa. Segir hún þá einnig örvænta vegna þess hversu langan tíma umsóknir þeirra virðast taka í kerfinu og að þeir hyggist, fái þeir ekki svör vegna sinna mála fljótlega, líka fara í hungurverkfall.

„Þeir hafa talað um að fara í hungurverkfall fyrir framan alþingishúsið,“ segir Linda.