Tvítugur piltur var í Héraðsdómi Reykjavíkur í dag dæmdur til að greiða Tryggingamiðstöðinni tæplega 1,7 milljónir króna vegna tjóns sem varð á fólksbifreið sem hann ók á miklum hraða vestur Miklubraut í febrúar 2006. Hafði Tryggingamiðstöðin greitt tjónið á bifreiðinni en faðir piltsins, og eigandi bifreiðarinnar, var með hana í kaskó hjá TM. Jafnframt hafði TM greitt tjón sem varð á ljósastaur sem pilturinn hafði ekið á. Piltinum er jafnframt gert að greiða 300 þúsund krónur í sakarkostnað.

Segir í niðurstöðu dómsins að  nægar sannanir væru fyrir því að hann hafi ekið bifreiðinni á miklum hraða og sýnt af sér stórkostlegt gáleysi við akstur.  Það tjón sem hlaust af við umferðaróhappið verði rakið til þeirrar háttsemi piltsins, sem var nýlega orðinn sautján ára er óhappið varð.

Samkvæmt skýrslu lögreglunnar í Reykjavík var henni tilkynnt aðfararnótt 17. febrúar 2006 að við afrein vestur Miklubraut og skammt austan við Skeiðarvogsbrú, væri svört Mercedes Benz bifreið utan vegar, mikið skemmd að framanverðu.

Í lögregluskýrslunni er haft eftir piltinum að hann hafi verið að koma af skólaballi í Gullhömrum í Grafarvogi og ekið vestur Miklubraut á u.þ.b. 200 kílómetra hraða. Kvaðst hann búa í Garðabæ og væri því ókunnugur á þessum slóðum. Hefði hann séð afreinina upp á Skeiðarvogsbrúna og ákveðið að fara þá leið, þar sem hann taldi að þaðan mætti komast í Garðabæ. Hefði hann hemlað niður og tekið beygjuna, en þá misst stjórn á bifreiðinni, sem fór út úr beygjunni. Bifreiðin hafnaði á ljósastaur og klippti hann í sundur, en staurinn dróst síðan með bifreiðinni þar til hún stöðvaðist skammt frá Skeiðarvogsbrú. Pilturinn hlaut ekki áverka við óhappið.

Í lögregluskýrslunni er haft lögregluvarðstjóra, sem var staddur á bensínstöð ESSO í Ártúnshöfða um svipað leyti og óhappið átti sér stað, að hann hafi séð svarta bifreið á ofsahraða vestur Ártúnsbrekku. Vegna hraða bifreiðarinnar, og þar sem skuggsýnt var, hefði hann þó ekki getað greint tegundarheiti hennar. Samkvæmt umferðargreini Vegagerðarinnar á móts við bensínstöð Skeljungs, austan Ártúnsbrekku, hafi bifreið mælst á 188 km/klst á svipuðum tíma og pilturinn ók þar um.

Við skýrslutöku hjá lögreglu síðar á árinu neitaði pilturinn  ítrekað að hafa sagt lögreglumönnum á vettvangi að hann hefði ekið bifreiðinni á 200 km hraða vestur Miklubraut. Kvaðst hann alltaf aka á löglegum hraða og taldi sig í umrætt sinn hafa ekið á 70–80 km hraða. Kannaðist hann heldur ekki við að hafa ekið niður Ártúnsbrekku, en sagðist hafa ekið af Vesturlandsvegi og yfir Höfðabakkabrú, þá suður Höfðabakka, vestur Stekkjarbakka og inn á Reykjanesbraut, síðan norður Reykjanesbraut og inn á Miklubraut. Þegar hann kom inn á Miklubraut hefði bifreið verið ekið framúr honum á mjög miklum hraða.

Í niðurstöðu héraðsdóms kemur fram að þótt ekkert liggi hér fyrir um hraða bifreiðarinnar í þann mund sem pilturinn missti stjórn á henni telji dómurinn nægar sannanir fram komnar fyrir því að hann  hafi í aðdraganda óhappsins ekið allt of hratt miðað við aðstæður og leyfilegan hámarkshraða.

Þrátt fyrir síðari framburð piltsins hjá lögreglu þykir ekkert fram komið sem hrakið getur framburð þeirra lögreglumanna sem gáfu skýrslu fyrir dóminum og staðfestu frásögn piltsins um að hann hefði ekið á um 200 km hraða vestur Miklubraut. Þá þykir frásögn piltsins um akstursleið hans af Vesturlandsvegi og síðar inn á Miklubraut ótrúverðug. Miklu fremur bendir framburður þess lögreglumanns, sem var við bensínstöð ESSO í Ártúnsbrekku skömmu fyrir óhappið, eindregið til þess að þar hafi bifreiðin sem pilturinn ók verið á ferð, og henni ekið á ofsahraða niður Ártúnsbrekku.