Árvakur/RAX

Rekstrarafgangur af A-hluta bæjarsjóðs Mosfellsbæjar að undanskildum fjármagnsgjöldum var 414 milljónir króna. Fjármagnsgjöld voru tæpar 439 milljónir og var rekstrarhalli á A-hluta því rúmar 25 milljónir króna á árinu 2008. Veltufé frá rekstri var 402 milljónir og handbært fé frá rekstri var 541 milljón.

Að meðtöldum B-hluta stofnunum var neikvæð rekstrarniðurstaða upp á 168 milljónir króna. Skýrist það af vaxtagjöldum og gengistapi upp á um 694 milljónir.

Í tilkynningu frá Mosfellsbæ segir, að þótt bæjarsjóður hafi verið vel í stakk búinn til að bregðast við utanaðkomandi erfiðleikum hafi fjármagnsgjöld valdið því að rekstrarniðurstaða A-hluta var neikvæð. Samt sem áður sé lánasafn Mosfellsbæjar að stórum hluta í íslenskri mynt.

Fram kemur að Mosfellsbær sé ekki skuldsett bæjarfélag og notaði góðærið til að greiða niður lán. Ekki höfðu verið tekin langtímalán síðan árið 2004. Þetta var gert meðal annars til þess að búa svo um hnútana að hægt yrði að mæta hremmingum kæmu þær upp.

Mosfellsbær er sjöunda fjölmennasta sveitarfélag landsins með um 8400 íbúa og hefur þeim fjölgað um 57% á síðustu tíu árum. Í aðeins einu öðru sveitarfélagi á landinu, Álftanesi, hefur íbúum fjölgað hlutfallslega meira en í Mosfellsbæ á síðasta áratug.

Stefna Mosfellsbæjar hvað varðar framkvæmdir er sú nú, að áfram verður haldið með þær framkvæmdir á vegum sveitarfélagsins sem þegar eru hafnar en ekki verður ráðist í nýjar framkvæmdir nema fjármögnun þeirra sé tryggð á viðunandi kjörum.

Vefur Mosfellsbæjar