Höfuðstöðvar Orkuveitunnar. Ómar Óskarsson

Trúnaðarmenn starfsmanna Orkuveitu Reykjavíkur segja, að  trúnaðarbrestur sé kominn upp milli starfsmanna og stjórnar fyrirtækisins vegna ákvörðunar stjórnarinnar um að greiða eigendum félagsins 800 milljónir króna í arð.

Í fréttum Ríkisútvarpsins var vitnað til ályktunar sameiginlegs fundar trúnaðarmanna starfsmanna Orkuveitu Reykjavíkur þar sem lýst er á ákvörðun stjórnar OR um að greiða eigendum arð á sama tíma og fyrirtækið skili 73 milljarða tapi. Fyrir liggi ákvörðun um að skerða laun starfsmanna um 400 milljónir króna og starfsmenn hafi fallist á að fresta umsömdum launahækkunum í mars vegna slæmra rekstrarstöðu OR.

„Samkvæmt upplýsingum formanns stjórnar OR er gert ráð fyrir að greiða um 800 milljónir í arð og er hann því fjármagnaður til helminga með fyrirhuguðum launalækkunum. Trúnaðarmenn hjá OR mótmæla harðlega þessari ákvörðun stjórnar um arðgreiðslur og telur hana ganga þvert að þann samstarfsvilja sem starfsmenn fyrirtækisins hafa sýnt m.a. með því að fallast á launalækkanir og með frestun umsaminna launahækkana í mars s.l." segir í ályktuninni.

Er síðan lýst þeirri skýlausu kröfu starfsmanna OR, að nú þegar komi til framkvæmda  umsamdar launahækkanir þar sem það sé mat stjórnar OR að það séu fjárhagslegar forsendur til slíks.