Vinningshafarnir með viðurkenningar sínar.

IBBY á Íslandi veitti í dag þrjár Vorvinda-viðurkenningar í Gunnarshúsi við Dyngjuveg í Reykjavík en allt frá árinu 1987 hefur félagið veitt einstaklingum og stofnunum viðurkenningar á vorin fyrir framlag til barnamenningar á Íslandi.

Í ár hlutu fjórir einstaklingar viðurkenninguna, þau Jónína Leósdóttir, Brynhildur Björnsdóttir, Kristín Eva Þórhallsdóttir og Halldór Ásgrímur Elvarsson.

Í rökstuðningi frá IBBY segir: 

„Jónína Leósdóttir fékk Vorvinda-viðurkenningu fyrir unglingabækurnar Kossar og ólífur (2007) og Svart og hvítt (2008). Í þessum tveimur bókum er sögð þroskasaga Önnu, unglingsstúlku frá Vík í Mýrdal,sem dvelur sumarlangt í Brighton á Englandi. Kossar og ólífur hlaut nokkrar athygli og lof fyrir að vera fyrsta íslenska unglingabókin sem teflir fram samkynhneigðri söguhetju.

Þessar tvær bækur Jónínu prýða reyndar margir kostir sem einkenna góðar unglingabækur. Þær eru mjög vel skrifaðar, frásögnin er fjörleg, atburðarásin hröð og full af dramatískum uppákomum.

Útvarpsþátturinn Leynifélagið er tæplega tveggja ára gamall,en honum stýra Brynhildur Björnsdóttir og Kristín Eva Þórhallsdóttir. Markhópur þáttarins sem er á Rás eitt hjá RÚV eru börn á aldrinum 6-10 ára.Hann er á dagskrá fjórum sinnum í viku kl. 20.00 á kvöldin. Umfjöllunarefni þáttanna getur verið af ýmsum toga, t.d. óleystar ráðgátur, dýr sem heita undarlegum nöfnum og margt fleira.Sjónvarpsþættir og bíómyndir og tölvuleikir eru mjög fyrirferðamiklir í lífi barna í dag. Meðan myndir örva sjónskynjun örvar útvarpið ímyndunaraflið og gott ímyndunarafl er gulls ígildi.

Þriðja viðurkenningin var veitt Halldóri Á. Elvarssyni fyrir bækurnar Stafróf dýranna og Teljum dýr: 1, 2 og 3. Halldór er grafískur hönnuður og eru bæði myndir og texti eftir hann. Þetta eru fallegar og hugvitsamlegar bækur til að sýna fróðleiksfúsum börnum sem vilja læra um stafina og kynnast því sem bækur hafa að geyma - og svo má ekki gleyma því sem tölurnar búa yfir.“

IBBY er skammstöfun á enska heitinu The International Board on Books for Young People en það eru alþjóðleg samtök.