Hús Orkuveitu Reykjavíkur mbl.is/Sverrir

eftir Helga Bjarnason helgi@mbl.is

Stjórn Orkuveitu Reykjavíkur stendur við tillögu um að greiða sveitarfélögunum sem eiga fyrirtækið 800 milljónir kr. í arð. Trúnaðarmenn nokkurra stéttarfélaga starfsmanna OR gagnrýna áformin harðlega, í ljósi þess að þeir hafa tekið á sig skerðingar launa.

Í yfirlýsingu sem trúnaðarmenn stéttarfélaga starfsfólks OR sem eru innan ASÍ sendu stjórninni er harðlega mótmælt áformum um arðgreiðslur sem sagðar eru fjármagnaðar að helmingi með lækkun launa og frestun umsaminna launahækkana. Guðmundur Gunnarsson, formaður Rafiðnaðarsambands Íslands, telur að það muni hafa víðtækari áhrif, ef ákvörðunin stendur, meðal annars á stöðugleikaviðræður sem hefjast eiga fyrir alvöru á næstu dögum. Gylfi Arnbjörnsson, forseti ASÍ, hefur látið svipuð ummæli falla.

Þetta getur bent til þess að hefjast sé svipuð þróun og varð í fiskvinnslunni eftir að hluthafafundur Granda ákvað að greiða út arð.

Starfsfólk Orkuveitunnar er hins vegar ekki samstiga í þessu máli. Þannig segir Júlíana Guðmundsdóttir, trúnaðarmaður starfsfólks OR í Starfsmannafélagi Reykjavíkurborgar, að skoða verði heildarmyndina. Ef borgin fái ekki þennan arð muni það bitna á öllum í lakari þjónustu.

Í dag verða mikil fundarhöld út af þessu máli í höfuðstöðvum Orkuveitunnar.

Nánar er fjallað um málið í Morgunblaðinu í dag.