Hjólaðu í vinnuna átakið stendur til 26. maí. Guðmundur Rúnar Guðmundsson

Þátttakendur í átakinu hjólað í vinnuna höfðu um miðjan dag í dag hjólað kílómetrafjölda sem svaraði til 228 hringja í kringum landið.

„Stemmingin var geysilega góð,“ sagði Pálmi Freyr Randversson sem vaktaði í dag eitt af morgunkaffitjöldum Hjólað í vinnuna átaksins. En um 600 manns komu við í tjöldunum í morgun. „Hér var stanslaus straumur hjólreiðafólks sem staldraði við á leið til vinnu og þáði kaffi og ávexti."

Að sögn Pálma er margir orðnir  áhugasamir um að hjólreiðar verði að fullgildum samgöngumáta í borginni. „Ég hitti nokkra í morgun sem höfðu fest kaup á reiðhjóli fyrir sumarið með þau áform að nýta það eins vel og hægt er,“ sagði Pálmi sem er fulltrúi Reykjavíkurborgar í verkefnahópnum Hjólað í vinnuna.

Kaffihúsatjöld Hjólað í vinnuna átaksins voru í morgun milli klukkan hálfátta og hálfníu staðsett í Geirsnefi við Bíldshöfða, við brúna yfir Kringlumýrarbraut - Nauthólsvíkur megin, við Sæbrautina hjá gatnamótum Sæbrautar og Kringlumýrarbrautar. Var hjólandi vegfarendum boðið að hjóla við og fá sér bita frá Ávaxtabílnum og kaffi frá Kaffitár.

Voru samgöngumál og hjólreiðar ræddar í pásunni og félagsmenn í hjólreiðasamtökum smurðu jafnvel keðjur og pumpuðu í dekk þátttakenda.

Hjólað í vinnuna átakið hófst fyrir 14 dögum. Skráðir þátttakendur eru 7.613 í 1.103 liðum frá 463 fyrirtækjum.