Sex Íslendingar sem talið var að væru smitaðir af svínaflensu eru ekki smitaðir Reuters

Niðurstöður úr alls sex sýnum, sem tekin voru til rannsóknar síðastliðinn föstudag og laugardag frá einstaklingum sem grunur lék á að hefði smitast af inflúensu A (H1N1), sýna að þeir eru ekki sýktir af hinni nýju inflúensu. Allir í viðkomandi hópi tengdust manninum, sem greindist með inflúensuna fyrir helgi, fjölskylduböndum.

Áfram fylgst með sexmenningunum

Fylgst verður áfram með heilsufari sexmenninganna næstu daga og tekin ný sýni til rannsóknar ef vart verður inflúensulíkra einkenna hjá einhverjum þeirra. Ekki er ástæða til að gera aðrar ráðstafanir, samkvæmt upplýsingum frá sóttvarnarlækni.

Heilbrigðisyfirvöld leggja áherslu á að læknar og aðrir heilbrigðisstarfsmenn verði áfram vakandi fyrir því að taka sýni úr sjúklingum með inflúensulík einkenni og senda til greiningar á veirufræðideild Landspítala.  Áfram er í gildi hættustig hér á landi samkvæmt viðbragðsáætlun um inflúensufaraldur.

Viðbúnaðaráætlun og tilheyrandi ráðstafanir vegna farsótta eru dagskrárefni sameiginlegs fundar sóttvarnalækna og lögreglustjóra á landinu öllu í Reykjavík eftir hádegi í dag.

91 látinn en 12.501 smitaður

Samkvæmt upplýsingum Sóttvarnarstofnunar ESB voru staðfest tilfelli inflúensu A (H1N1) í heiminum í morgun alls 12.501 í 46 ríkjum. Langflest flensutilfellanna eru í Bandaríkjunum eða 6.552 en þar eru líka meðtalin líkleg tilvik þar í landi. Staðfest dauðsföll vegna inflúensunnar eru nú 91 talsins, langflest í Mexíkó eða 80. Níu dauðsföll eru staðfest í Bandaríkjunum, eitt í Kanada og eitt í Kosta Ríka. Flestir þessara einstaklinga voru með undirliggjandi sjúkdóma sem geta gert sýkingar af völdum inflúensu alvarlegri en ella, að því er segir í tilkynningu frá  sóttvarnalækni og almannavarnadeild ríkislögreglustjóra.

Sjá nánar á vef landlæknisembættisins