Júlíus Sigurjónsson

Eftir Guðna Einarsson og Ingibjörgu B. Sveinsdóttur

Breytingar á skipulagi lögreglu höfuðborgarsvæðisins, sem tóku gildi 1. maí síðastliðinn, mælast misjafnlega fyrir hjá lögreglumönnum.

Með nýja skipulaginu verða lögreglustörfin í auknum mæli færð út á lögreglustöðvar í Austurbæ, Vesturbæ, Mosfellsbæ, Kópavogi og Hafnarfirði. 

Lögreglumenn sem starfað hafa í deildum á borð við rannsóknadeild, forvarnadeild, fyrirkallsdeild o.fl. fara út á stöðvarnar. Hins vegar mun starfsemi kynferðisbrotadeildar og fíkniefnadeildar verða með svipuðu sniði og áður.

Arinbjörn Snorrason, formaður Lögreglufélags Reykjavíkur, segir lögreglumenn hafa haft samband við félagið og lýst efasemdum sínum um gildi þessara breytinga. Sumir telji að jafnvel sé verið að stíga stórt skref aftur á bak á sumum sviðum.

Helsta gallann á nýju fyrirkomulagi telur Arinbjörn vera að stjórn almennu löggæslunnar á höfuðborgarsvæðinu verði ekki lengur miðlæg.

„Nú göngum við vaktir og erum með aðalvarðstjóra allan sólarhringinn. Í komandi fyrirkomulagi verður mannskapnum skipt í fimm einingar. Aðalvarðstjóri verður bara á daginn en varðstjórar á lögreglustöðvunum á kvöld- og næturvöktum og um helgar.“