mbl.is/ÞÖK

Lestrarkunnátta drengja á for- og grunnskólaaldri á Íslandi hefur versnað frá árinu 2000 samkvæmt svonefndri PISA rannsókn, sem Efnahags- og samvinnustofnunin, OECD, hefur gert. Hefur bilið milli stúlkna og drengja í lestrarkunnáttu aukist.

Stofnunin segir, að í flestum löndum standi kynin nú að mestu jafnfætis í lestrar- og stærðfræðikunnáttu. Hins vegar leiði kerfisbundið mat í ljós að eigin skynjun nemenda á kynhlutverki haldi þeim enn að hluta til niðri. 

Í stærðfræði sé frammistaða drengja og stúlkna svipuð á forskólaaldrinum en þegar börnin eldast standi drengir sig almennt betur í aðildarríkjum OECD. 

Í lestri hins vegar standi stúlkur sig almennt betur á forskólaaldrinum og sú þróun heldur áfram eftir því sem börnin eldast.  OECD segir, að kynabilið hafi vaxið umtalsvert í nokkrum ríkum og 15 ára drengir hafi staðið sig ver árið 2006 en árið 2000 í átta ríkjum: Íslandi, Japan, Grikklandi, Noregi, Ítalíu, Frakklandi, Mexíkó og Ástralíu.  

OECD segir, að þessi þróun endurspegli viðhorf og hvatningu nemendanna. Stúlkur hafi mun meiri áhuga en drengir á lestri en reikningurinn vaxi þeim í augum. Þótt hæfni bæði drengja ogs stúlkna til að leysa vandamál hafi aukist til muna um 15 ára aldurinn séu stúlkur síðri í að leysa stærðfræðivandamál en drengir. 

Skýrsla OECD