Eftir Sigtrygg Sigtryggsson - sisi@mbl.is

Alls verða 6.455 tonn af þorski til skiptanna í strandveiðunum og skiptast þau milli fjögurra landsvæða. 3.955 tonnum er skipt með tilliti til þess hvernig byggðakvóta síðustu ára hefur verið skipt en 2.500 tonnum er skipt jafnt milli svæðanna. Öllum bátum er heimilt að stunda veiðarnar, en ýmsar takmarkanir valda því, að aðeins smærri bátar munu gera það.

Óvíst er á þessari stundu hve mörgum bátum verður beint á strandveiðarnar. Sjávarútvegsráðuneytið hefur áætlað að umsækjendur verði um 300 og Fiskistofa áætlar að aukinn kostnaður stofnunarinnar við eftirlit með veiðunum verði á bilinu 4,5-6,5 milljónir króna.

Ef við gefum okkur að 300 bátar stundi veiðarnar og allir veiði jafnt, sem auðvitað verður ekki raunin, gerir það 21,5 tonn á bát.

Í frumvarpinu eru strandveiðarnar kallaðar frjálsar handfæraveiðar. Þær mega hefjast 1. júní nk. og standa til 31. ágúst. Ljóst er að frumvarpið kemur það seint fram í þinginu, að ekki verður hægt að hefja veiðarnar 1. júní eins og til stóð.

Þegar áformin um strandveiðarnar voru kynnt í vetur skapaðist nokkurs konar gullgrafarastemning í þjóðfélaginu því segja má að fiskimiðin við landið hafi verið lokuð nýliðum allt frá árinu 2006. Til dæmis varð stóraukin spurn eftir smábátum hjá þeim fyrirtækjum sem sérhæfa sig í sölu smábáta.

Í athugasemdum með frumvarpinu segir m.a.: „Með strandveiðunum er opnað fyrir takmarkaðar veiðar þeirra sem ekki þurfa að vera handhafar veiðiheimilda. Þannig er til að mynda ungu og áhugasömu fólki auðveldað að afla sér reynslu og þekkingar um leið og sveigjanleiki er aukinn.“ Ýmsir hafa í ræðu og riti bent á, að með þessu opnist enn einn möguleikinn fyrir þá sem áður hafi veitt í fiskveiðikerfinu og selt allar sínar heimildir háu verði, að komast inn í kerfið enn einu sinni.