Árni Sæberg

Eftir Ágúst Inga Jónsson aij@mbl.is

Margir leggja hönd á plóginn við Hekluskógaverkefnið. Auk starfsmanna eru sjálfboðaliðar drjúgir og verktakar ýmiss konar. Þá nýtur verkefnið stuðnings Landgræðslunnar, Skógræktarinnar og landeigenda.

Áætlað er að planta um 500 þúsund plöntum á vegum Hekluskóga í sumar. Til þessa verkefnis voru veittar 24,8 milljónir króna. Það er helmingur þess fjármagns sem Hekluskógar notuðu í fyrra til að gróðursetja 300 þúsund plöntur, en þá var mikil vinna lögð í uppgræðslu lands með áburðargjöf  

Hreinn Óskarsson, verkefnastjóri Hekluskóga og skógarvörður Skógræktarinnar á Suðurlandi, segir að í ár verði áherslan lögð á að skapa störf og styðja við innlenda framleiðslu. Áburður verði keyptur til að hjálpa plöntum af stað. Hins vegar verði stórlega dregið úr annarri starfsemi eins og að græða upp með grasi. Það kalli á enn meiri notkun áburðar, sem framleiddur sé erlendis og hafi hækkað mjög í verði.

Hekluskógaverkefnið má rekja til ársins 2005 en áætlað er að rúmlega 90 þúsund hektarar lands í nágrenni Heklu séu innan Hekluskógasvæðisins eða nálægt 1% af Íslandi. Um 70% þess lands er lítið gróið og á hluta þess er sandfok og mikið rof.

Gert er ráð fyrir að verkefnið verði unnið í þrepum. Í fyrsta lagi að stöðva sandfok og græða upp illa farið land til að bæta skilyrði fyrir trjágróður. Síðan að gróðursetja birki, gulvíði og loðvíði í lundi þaðan sem þessar tegundir geta sáð sér út á nokkrum áratugum yfir allt svæðið. Aðgerðir á svæðinu miða fyrst og fremst að því að örva gróðurframvindu, fremur en að um samfellda ræktun verði að ræða.