Slökkviliðiðsmenn á Selfossi að störfum. mbl.is/Guðmundur Karl

Uppsagnir rúmlega helmings fimmtán slökkviliðsmanna í liði Brunavarna Árnessýslu komu til framkvæmda um helgina. Hinir munu að óbreyttu hætta á næstunni.

Samkvæmt heimildum Morgunblaðsins hefur þess verið freistað að fá einhverja þessara manna til að snúa aftur eða draga uppsagnir sínar til baka. Í hlutastörfum vinna um sextíu manns hjá Brunavörnum Árnessýslu. Í þeim hópi eru 23 búsettir á Selfossi og er meirihluti þeirra hættur eða á förum.

Deilur innan Brunavarna Árnessýslu hafa staðið um alllangt skeið. Ýmis atriði hafa verið inni í myndinni, svo sem striðleiki í samskiptum milli yfir- og undirmanna auk heldur sem deilt hefur verið um launamál og túlkun kjarasamninga. Svo fór að fimmtán slökkviliðsmenn sögðu upp störfum og eru það þeir sem virkastir hafa verið í starfinu. Í þeirra stað hafa þrettán nýir menn verið ráðnir til starfa og munu þeir fá grunnþjálfun á námskeiði á vegum Brunamálastofunar. Ljóst er þó að á meðan þjálfun stendur hefur slökkviliðið ekki sama styrkleika og áður. Slökkviliðsmenn sem enn eru í liðinu segjast bera nokkurn kvíðboga gagnvart þessu og telja að liðið gæti illa ráðið við meiriháttar eldsvoða, enda þótt slökkvilið í nærliggjandi byggðum og á höfuðborgarsvæðinu geti veitt aðstoð ef nauðsyn krefur.

„Það má alltaf deila um hvort gengið hafi verið nógu langt til að mæta þeim kröfum sem slökkviliðsmenn hafa haft uppi. Ég treysti því hins vegar að stjórn og fulltrúaráð Brunavarna Árnessýslu leysi þessa deilu og að þannig verði um hnútana búið að hér skapist ekki hættuástand. En eðlilega hefur fólk hér áhyggjur af þessu ástandi,“ sagði Ragnheiður Hergeirsdóttir, bæjarstjóri sveitarfélagsins Árborgar.

Í samtali við Morgunblaðið kvaðst Kristján Einarsson slökkviliðsstjóri ekki vilja tjá sig um málið.