Á meðal þess sem til skoðunar er í þrotabúi Eignarhaldsfélagsins Fons er hvort hlutafjáraukning í flugfélaginu Iceland Express síðasta haust hafi verið eðlileg. Að sögn Óskars Sigurðssonar skiptastjóra hefur þó engin ákvörðun verið tekin um að rifta kaupunum, málið sé einfaldlega í skoðun eins og aðrar ráðstafanir Fons allt að tvö ár aftur í tímann. Óskar hefur kallað eftir gögnum málsins og segir að þau séu komin í hús.

Landsbanki Íslands, sem átti hagsmuna að gæta í flugfélaginu, skoðaði hlutafjáraukninguna síðasta haust og gerði þá ekki athugasemdir við hana. Í fréttatilkynningu sem Iceland Express sendi frá sér í gærkvöldi, eftir að fjallað var um málið í fréttum Stöðvar 2, kom fram að í haust eftir bankahrunið hefði verið ljóst að nýtt fjármagn vantaði í rekstur félagsins. „Ekki var í mörg hús að venda því rekstrarfé lá ekki á lausu. Var því gripið til þess ráðs að auka hlutafé með framlagi frá eignarhaldsfélaginu Feng,“ segir í tilkynningunni. Þar sagði einnig að félagið harmaði að reynt væri að ala á tortryggni í viðskiptalífinu með fréttaflutningnum.

Heildarverðmætið 326 milljónir í nóvember

Fons hefur verið í eigu athafnamannsins Pálma Haraldssonar. 24. nóvember síðastliðinn eignaðist Eignarhaldsfélagið Fengur, annað félag sem tengist Pálma, 92% hlut í Iceland Express eftir 300 milljóna króna hlutafjáraukningu. Fyrir átti Fengur ekkert í Iceland Express, en Fons átti það alfarið. Eftir hlutafjáraukninguna var hlutur Fons í flugfélaginu því 8%.