Hæstiréttur Íslands. mbl.is/Brynjar Gauti

Hæstiréttur hefur staðfest fjögurra ára fangelsisdóm yfir rúmlega fertugum karlmanni sem fór í heimildarleysi inn í hús, og inn í svefnherbergi fimm ára sofandi stúlku. Þar braut hann gegn stúlkunni kynferðislega.

Maðurinn, Jóhann Sigurðarson, fór í september á síðasta ári inn um glugga á húsi í Reykjavík og inn í svefnherbergi þar sem fimm ára gömul stúlka svaf við hlið ömmu sinnar. Inni í herberginu klæddi maðurinn litlu stúlkuna úr buxum en stúlkan og amma hennar vöknuðu og ráku hann út.

Jóhann var handtekinn nokkru síðar á grundvelli fingrafara, sem fundust í íbúðinni, og sagðist þá ekkert muna eftir nóttinni. Rétturinn taldi hins vegar sannað, s.s. þar sem fingrafar hans fannst innan á rúðu hússins og DNA sýni úr hráka á tröppum þess reyndist úr honum, að maðurinn hafi brotið gegn stúlkunni.

Jóhann á að baki langan brotaferil, þar sem hann var m.a. dæmdur fyrir að taka fjögurra ára gamalt stúlkubarn sofandi úr rúmi sínu og fara með það út úr húsi um hánótt um miðjan vetur.  Þá hefur hann verið dæmdur fyrir kynferðisbrot gegn konu, líkamsárás og ítrekuð húsbrot.

Auk fangelsisdómsins var Jóhann dæmdur til að greiða stúlkunni 800 þúsund krónur í miskabætur auk málskostnaðar.

Einn dómari í Hæstarétti, Jón Steinar Gunnlaugsson, skilaði sératkvæði og vildi dæma Jóhann í 3 ára fangelsi með vísan til dómaframkvæmdar. Hann vildi jafnframt dæma stúlkunni 900 þúsund króna bætur.