„Svona gera menn ekki," sagði aðalvarðstjóri. mbl.is/Július

„Þeir snertu ekki strákinn," segir tvítugur karlmaður, sem lét vini sína endurheimta bifreið sem 16 ára piltur hafði keypt af honum. Eigandi bílsins segist ítrekað hafa reynt að láta kaupin ganga til baka eftir að í ljós kom að kaupandinn hafi hvorki haft aldur til að eiga slíkan bíl né aka honum.

Fram kom á mbl.is í morgun að kært hafi verið til lögreglu að BMW-bíl hafi verið stolið í Kópavogi í nótt, eigandanum hent út úr bílnum og bíllinn síðan tekinn traustataki. Sagði lögregla að málið yrði rannsakað sem bílrán.

Maður, sem segist vera skráður eigandi bílsins, segir aðra sögu af málsatvikum. Hann sagðist hafa uppgötvað að pilturinn hafði ekki aldur til að eiga bíl þegar hann ætlaði að skrá eigendaskiptin fyrir nokkrum mánuðum. Ekki tókst honum að hafa upp kaupandanum í kjölfarið og segir að þegar rukkanir fóru að berast fyrir hinum ýmsu gjöldum og sektum, sem hlóðust upp á bílinn í hans nafni, hafi vinir hans boðist til að mæla sér mót við handhafa bílsins og endurheimta hann. 

„Hefur ekki upp á sig að tala við lögregluna"

En datt þeim ekki í hug að láta lögregluna annast málið? „Ég hef talað við lögregluna í svona máli og þeir gera ekki neitt ef maður tilkynnir bíl stolinn. Það var stolið bíl af félaga mínum og hann er ekki fundinn enn. Ég vissi að það myndi ekki hafa neitt upp á sig," sagði bíleigandinn, sem vildi ekki að nafn hans kæmi fram.

Óttast hann ekki að drengurinn reyni sömu aðferð við að ná bílnum aftur? „Nei, bíllinn er á góðum stað, hann finnur hann ekki," sagði maðurinn og bætti við, að hann hygðist selja bílinn aftur ef hann fengi ekki þessar skuldir borgaðar.

 „Svona gera menn ekki"
Málið er rannsakað sem rán hjá lögreglunni á höfuðborgarsvæðinu. „Við erum með 17 ára dreng og föður hans hér í yfirheyrslu vegna þessa máls," sagði Gylfi Sigurðsson aðalvarðstjóri á lögreglustöð 3 á höfuðborgarsvæðinu.

Var ólögmætt að endurheimta bílinn með þessum hætti? „Já, það eru einhverjar deilur þarna í gangi og ljóst er að svona gera menn ekki, það má ekki hirða af fólki það sem þeir hafa selt," sagði Gylfi.