Steingrímur J. Sigfússon. mbl.is/Ómar

Steingrímur J. Sigfússon, fjármálaráðherra, sagði á Alþingi að í dag hefði ríkisstjórn, þingflokkum og utanríkismálanefnd þingsins verið kynnt staðan í samningaviðræðum um Icesave-reikningana, í ljósi þess að nú sé staðn í viðræðunum sú að möguleg lending sé í sjónmáli.

Þingmenn stjórnarandstöðunnar hafa gagnrýnt ríkisstjórnina harðlega  á þinginu í dag fyrir að vilja ekki ræða um stöðu málsins opinberlega í ljósi þess að ráðherrar hafa rætt við fjölmiðla um málið í dag. Þá hefur verið lesin upp frétt af mbl.is, þar sem fjallað er um innihald mögulegs samnings. Krefjast þeir þess að málið verði tekið án tafar á Alþingi

Ragnheiður Elín Árnadóttir, þingmaður Sjálfstæðisflokksins, sagði að frétt mbl.is væri nákvæm lýsing á þeim upplýsingum, sem þingmenn fengu í morgun undir trúnaði.

Þingmenn stjórnarandstöðu hafa einnig gagnrýnt fjármálaráðherrra vegna orða hans á Alþingi sl. miðvikudag að ekki væru líkur á að niðurstaða fengist í Icesave-viðræðunum á næstu dögum. Nú virtist annað komið á daginn.

Steingrímur sagði að þegar hann hafi látið þau orð falla að ekki væru líkur á því að undirritun færi fram á næstu dögum „þá var það mat á stöðu þessara þreifinga að ólíklegt væri að neitt slíkt væri í sjónmáli. Síðdegis í gær varð sú framþróun í þessum viðræðum að þá fór að líta út fyrir að mögulega gæti náðst lending.,“ sagði Steingrímur.  Því hafi verið óskað eftir að hlé yrði gert á viðræðunum, svo hægt væri að kynna ríkisstjórn, formönnum stjórnarandstöðuflokkanna, utanríkismálanefnd og síðan öllum þingflokkum stöðuna.

Steingrímur sagði, að enn væru ekki aðstæður til að ræða um stöðu samningaviðræðnanna efnislega undir því fundarformi, sem væri á Alþingi. Það yrði hins vegar gert við fyrsta mögulega tækifæri þegar efni standi til.