Stjórn og samgöngunefnd Fjórðungssambands Vestfirðinga átti fund með samgönguráðherra í síðustu viku á Ísafirði. Á dagskrá voru einkum samgöngumál og lögðu Vestfirðingar áherslu á að fjórðungurinn fengi að njóta forgangs í samgönguframkvæmdum á næstu árum.

Fram kemur á vef samgönguráðuneytisins að Kristján L. Möller samgönguráðherra hafi farið yfir helstu framkvæmdir á sviðum vega- , fjarskipta-, flug- og siglingamála sem nú standi yfir og sagði nokkra óvissu ríkja um næstu skref vegna stöðunnar í ríkisfjármálum. Þá komu sameiningarmál sveitarfélaga í fjórðungnum einnig til umræðu.

Fulltrúar í stjórn og samgöngunefnd Fjórðungssambandsins eru bæjarfulltrúar í ýmsum sveitarfélögum á Vestfjörðum og tóku þeir virkan þátt í fundinum.

Birna Lárusdóttir, varaformaður stjórnar Fjórðungssambands Vestfirðinga, kynnti í upphafi fundar þá skoðun sambandsins að tími væri kominn til þess að Vestfirðir nytu forgangs við samgönguframkvæmdir. Óskaði hún eftir að við uppbyggingu í samgöngum næstu árin næðist eins konar þjóðarsátt um það viðhorf.

Halldór Halldórsson, formaður stjórnar Sambands íslenskra sveitarfélaga, flutti erindi um endurskoðun á byggðastefnu sambandsins og Þorgeir Pálsson, framkvæmdastjóri Atvinnuþróunarfélags Vestfjarða, ræddi landshlutaáætlun fyrir Vestfirði. Þá fór Sigurður Pétursson, formaður samgöngunefndar Fjórðungssambandsins, yfir samgöngumál á Vestfjörðum og staldraði við áherslur nefndarinnar í vegamálum, fjarskiptamálum, flugmálum og siglingamálum.