Guðríður Arnardóttir.

„Þessi skýrsla staðfestir það sem okkur grunaði að viðskiptin við þetta fyrirtæki [Frjálsa miðlun] eru mjög óeðlileg,“ segir Guðríður Arnardóttir, bæjarfulltrúi Samfylkingarinnar. Samfylkingin vill að Gunnar I. Birgisson, bæjarstjóri Kópavogsbæjar, víki.

„Ef hann finnur það ekki hjá sjálfum sér að víkja, þá þurfa hans félagar í meirihlutanum að taka ákvörðun um það hvort þeir treysta honum áfram til þess að sitja í þeirra umboði sem bæjarstjóri,“ segir hún.

„Það er alveg ljóst að þessar athugasemdir, sem endurskoðendurnir gera í skýrslunni, er áfellisdómur á störf hans sem bæjarstjóra. Hann ber ábyrgð á rekstri bæjarins,“ segir Guðríður.

Endurskoðunarfyrirtækið Deloitte segir í greinargerð um viðskipti Frjálsrar miðlunar við Kópavogsbæ, að almennt virðist ekki hafa verið gerðar verðkannanir eða leitað tilboða í verkefni sem fyrirtækið hafi unnið fyrir bæinn. Viðskiptin séu því hugsanlega brot á lögum um opinber innkaup.