Valtýr Sigurðsson. mbl.is/Ómar

Valtýr Sigurðsson segist ekki hafa hugleitt að segja af sér embætti ríkissaksóknara. Eva Joly, ráðgjafi sérstaks saksóknara, sagði í Katsljósi sjónvarpsins í gærkvöldi að það væri ekki nægilegt að Valtýr viki að hluta eins og hann hefði gert, hann yrði að víkja alveg.

Valtýr ritaði Rögnu Árnadóttur dómsmálaráðherra bréf 18. maí s.l., þar sem hann segir rétt að hann víki tímabundið, til að byrja með til 1. júní 2010, í öllum málum sem heyra undir embætti sérstaks saksóknara. Þetta gerði Valtýr vegna þess að Sigurður sonur hans er annar forstjóra Exista hf.

„Ríkissaksóknara er mikið í mun að hið nýstofnaða embætti sérstaks saksóknara njóti fulls strausts og að sjálfstæði þess sé hafið yfir allan vafa," segir Valtýr m.a. í bréfinu. Dómsmálaráðherra brást við bréfinu með því að skipa Björn Bergsson hæstaréttarlögmann sem ríkissaksóknara í öllum málum sem varða bankahrunið.

Valtýr kveðst ekki sjá hvernig Eva Joly, sem ráðgjafi sérstaks saksóknara, tengist málum hans embættis eftir að hann hafi hætt öllum afskiptum að málum sem snúa að embætti sérstaks saksóknara. „Ég hef verið að berjast fyrir því að byggja upp ákæruvaldið í landinu en hef skort til þess peninga," segir Valtýr. Hann segir að það séu vandamál alls staðar og það verði að hafa í huga að verkefni ákæruvaldsins í landinu snúi ekki bara að bankamálum.