mbl.is/Golli

Stjórn Lánasjóðs íslenskra námsmanna ætlar ekki að aðhafast frekar vegna viðskipta, sem sjóðurinn átti við Frjálsa miðlun, fyrirtæki dóttur Gunnars Birgissonar, þegar Gunnar var stjórnarformaður  sjóðsins.

Ríkisendurskoðun hefur farið yfir viðskipti LÍN við Frjálsa miðlun og kemur fram í skýrslu, sem lögð var fram á stjórnarfundi í dag, að á tímabilinu 1992-1998 námi viðskipti LÍN við fyrirtækið 11,3 milljónum króna. Lagðir voru fram 40 reikningar vegna verka.

Niðurstaða könnunar Ríkisendurskoðunar er, að það sem reikningarnir sýni hafi Frjáls miðlun raunverulega unnið fyrir Lánasjóðinn. Þar sem ekki virðist hafa verið leitað verðtilboða áður en Frjáls miðlun tók verkefnin að sér sé ekki hægt að fullyrða hvort hægt hefði verið að fá þessa þjónustu á hagstæðari kjörum. 

Ríkisendurskoðun vísar í endurskoðunarskýrslu sína um sjóðinn vegna ársins 1997 þar sem talin var ástæða til að gera athugasemd við viðskiptin við Frjálsa miðlun. Athugasemdin var eftirfarandi.

Nokkuð er um að LÍN kaupi auglýsingar í blöð ýmissa stúdentasamtaka. LÍN hefur látið Frjálsa miðlun útbúa auglýsingafilmur í hin ýmsu stúdentablöð. Á árinu 1997 lagði fyrirtækið fram reikninga vegna alls 13 auglýsinga. Nam kostnaðurinn alls tæplega 1,3 milljónum króna. Þar sem ekki er nauðsynlegt að útbúa svo margar auglýsingar, en þær voru margar hverjar nánast eins, telur Ríkisendurskoðun kostnaðinn óþarflega háan.

Í skýrslu Ríkisendurskoðunar, sem lögð var fyrir stjórn LÍN í dag, kemur fram að þáverandi framkvæmdastjóra LÍN var gefinn kostur á að tjá sig um málið. Hann sagðist ekki muna hvernig það bar að, að LÍN skipti við þetta auglýsingafyrirtæki en ekki önnur fyrirtæki enda sé langt um liðið. Hins vegar lagði hann áherslu á að stærstu viðskiptin samfara útgáfu bæklinga hefðu aðeins átt sér stað fyrstu árin en síðan hafi LÍN séð um þann þátt sjálfur.