Borgarstjórinn í Reykjavík, Hanna Birna Kristjánsdóttir, tók í dag fyrstu skóflustunguna að nýjum skóla sem staðsettur verður við Úlfarsbraut 118 – 120 í Úlfarsárdal. Þar verður fyrst í stað samrekinn leik- og grunnskóli fyrir 1.- 4. bekk, ásamt frístundaheimili. Skólinn er fyrsta þjónustubygging borgarinnar í Úlfarsárdal og verður tekinn í notkun í ágúst 2010. Jarðvegsvinnutæki voru mætt á staðinn og verktakar tilbúnir til að hefjast handa.

Samnýting húsnæðis er hagstæð lausn

Í tilkynningu frá Reykjavíkurborg segir að með því að samnýta húsnæðið fyrir leik- og grunnskóla fari fjármagnið til varanlegrar uppbyggingar í stað bráðabrigðalausna. Leikskólinn verður strax í sínu endanlega húsnæði og starfsemi grunnskólans verður á sama svæði og fyrirhugaður grunnskóli og íþróttasvæði. „Jafnframt gefst spennandi tækifæri til samreksturs leikskóla, grunnskóla og frístundaheimilis í Reykjavík sem er í samræmi við áherslur Reykjavíkurborgar í menntamálum og ný lög um leik- og grunnskóla. Fjármögnun vegna þessa er innan 3ja ára áætlunar vegna leikskóla og grunnskóla í Úlfarsárdal,“ segir í tilkynningunni. 

Á fyrsta starfsári skólans er reiknað með 40-50 börnum á leikskólaaldri og svipuðum fjölda grunnskólabarna í 1.-4. bekk. Gert er ráð fyrir að skólinn „eldist" með börnunum, þ.e. að árlega bætist einn árgangur við í skólastarfinu, jafnhliða því sem börnin verða eldri.

Heildarkostnaður er um 460 milljónir króna

Leikskólabyggingin er 920 m². Burðarvirki er járnbent steinsteypa. Útveggir verða einangraðir og múrhúðaðir að innan, að utan verður ýmist sjónsteypa eða múr. Áætlaður heildarkostnaður við byggingu og lóð er um 460 milljónir króna.

Verkefnisstjórn er á hendi Framkvæmda- og eignasviðs Reykjavíkurborgar; og verkfræðihönnun er hjá Mannviti og Teiknistofunni Óðinstorgi. Um hönnun sá Arkþing ehf.

Framkvæmda- og eignasvið hefur bauð út jarðvinnu og varð Jökulsfell hlutskarpast. Jarðvegsvinnutæki voru í dag komin á staðinn og verktakar tilbúnir til að hefjast handa.