Ekki hefur verið ákveðið hver tekur við starfi bæjarstjóra í Kópavogi af Gunnari I. Birgissyni sem boðist hefur til að hætta, verði það til þess að meirihlutasamstarf Sjálfstæðisflokks og Framsóknarflokks í bænum haldi áfram. Óánægju gætir meðal sjálfstæðismanna með að Gunnar skuli víkja, að kröfu framsóknarmanna.

Málið verður útkljáð á fundi fulltrúaráðs sjálfstæðisfélaganna í kvöld. Til umræðu hefur komið meðal stuðningsmanna Gunnars að skora á hann að hætta ekki.

Málið hefur verið rætt á óformlegum fundum hjá sjálfstæðismönnum undanfarna daga og manna í millum. Niðurstaða er ekki fengin. Gunnar hefur ekki sagt frá því hvernig hann sjái framhaldið fyrir sér og hann kallaði bæjarfulltrúana ekki saman til fundar í gær, eins og til stóð. Afstaða bæjarstjórnarflokksins til þess hvort arftaki Gunnars eigi að koma úr þeirra röðum eða hvort leita eigi annað, liggur því ekki fyrir.

Líklegt er úr þessu að málið skýrist ekki fyrr en eftir fund fulltrúaráðsins sem boðaður hefur verið klukkan átta í kvöld. Þá kynnir Gunnar væntanlega hugmyndir sínar um framhaldið.

Nánar er fjallað um málið í Morgunblaðinu í dag.