Vilja gera landnýtingaráætlun fyrir ferðamennsku
Frá Hveravöllum. mbl.is/ÞÖK
Dæmi eru um að 1800 manns hafi verið á Hakinu ofan við Almannagjá á Þingvöllum á sama tíma, sérlega þegar skemmtiferðaskip eru í Reykjavíkurhöfn.
Þetta kemur m.a. fram í greinargerð með þingsályktunartillögu, sem Siv Friðleifsdóttir, þingmaður Framsóknarflokks, hefur lagt fram á Alþingi ásamt þingmönnum úr öllum flokkum. Þar er lagt til að gerð verði landnýtingaráætlun fyrir ferðamennsku á miðhálendinu þannig að unnt sé að taka vel á móti þeim aukna fjölda ferðamanna sem ferðast um hálendið án þess að ganga of nærri því.
Siv segir, að svara þurfi ýmsum grundvallar spurningum, svo sem hvernig ferðamanna Íslendingar vilji höfða til og hver eigi að borga fyrir uppbyggingu innviða á ferðamannasvæðum, svo sem stíga, salerna, útsýnispalla o.s.frv.
Fram kemur í greinargerð með frumvarpinu, að nokkrar leiðir hafi verið til umræðu í þessu sambandi. Þær séu að leggja lögbundið gjald á fyrirtæki í ferðaþjónustu, innheimta aðgangseyri af ferðamönnum á einstökum svæðum, leggja gistináttagjald á hverja gistinótt, nýta hluta veggjaldsins eða lögbinda gjald sem yrði tekið af ferðamönnum og innheimt við brottför úr landi. Er nefnt í því sambandi að 400 króna gjald á hvern ferðamann gæfi um miðjan næsta áratug um 400 milljónir króna í aðra hönd ef spár um fjölda ferðamanna ganga eftir.
Siv segir, að erlendum ferðamönnum hafi fjölgað mikið síðustu áratugi hér á landi og þótt reiknað sé með smávægilegri fækkun á þessu ári megi búast við að Íslendingar muni ferðast meira um landið í ár en venjulega. Á síðasta ári sóttu um 502 þúsund erlendir ferðamenn landið heim og búast megi við að yfir ein milljón erlendra ferðamanna sæki landið heim árið 2016 eða fljótlega upp úr því.
Grundvallaratriði sé að vinna landnýtingaráætlun fyrir ferðamennsku, sérstaklega á miðhálendinu svo hægt sé að taka á móti auknum fjölda ferðamanna án þess að skemma viðkvæma náttúru eða upplifun ferðamannanna.
