eftir Helga Bjarnason helgi@mbl.is

Íslenska jarðhitafélagið Envent hefur gert fyrsta samninginn um sölu á orku frá væntanlegu orkuveri á Filippseyjum. Til stendur að ganga frá fjórum orkusölusamningum til viðbótar á næstunni.

„Þetta er mjög mikilvægt fyrir verkefnið sjálft og fjármögnunina,“ segir Guðmundur F. Sigurjónsson, framkvæmdastjóri Envent, um gildi samningsins. Virkjunin verður á Biliran-eyju og samningurinn er við orkuveitu þar. Meðalverð á hverja kílóvattstund er tólf krónur. Hinir samningarnir eru við orkuveitur á nálægum eyjum. Heildarverðmæti þeirra er áætlað 515 milljónir Bandaríkjadala eða um 66 milljarðar króna.

Fyrsti áfangi virkjunarinnar sem taka á í notkun árið 2012 er áætlaður 50 megawött og áform eru um að bæta síðar við tveimur jafnstórum áföngum þannig að heildarafl virkjunarinnar verði 150 MW.

Unnið er að fjármögnun orkuversins en gert er ráð fyrir að það taki hálft til heilt ár. „Þetta er mjög arðbært verkefni. Við fáum hátt orkusöluverð og höfum mikla reynslu í að hanna og byggja svona virkjanir. Við gerum okkur vonir um að fjármögnun gangi vel í því ljósi,“ segir Guðmundur þegar hann er spurður um möguleika á fjármögnun við núverandi aðstæður á fjármálamörkuðum heimsins.

Félaginu var úthlutað rannsóknar- og nytjaleyfi á Biliran-eyju í júlí 2008. Guðmundur segir að aðstæður séu að nokkru leyti líkar því sem Íslendingar þekkja við Kröflu.