Sverrir Vilhelmsson

Héraðsdómur Reykjavíkur hefur dæmt blaðamann DV til að greiða manni 1 milljón króna í bætur fyrir ummæli, sem viðhöfð voru um hann í blaðagrein, og dómurinn telur brjóta gegn friðhelgi einkalífs manns. Sami blaðamaður var dæmdur í síðustu viku til að greiða fyrrverandi eiginkonu mannsins 700 þúsund krónur í bætur.

Dómurinn í dag er vegna sömu greina, og dómurinn sem féll í síðustu viku, umfjöllunar um forstöðumann meðferðarheimilis á Norðurlandi, sem birtist í helgarblaði DV í ágúst 2007 og fleiri tölublöðum í kjölfarið. Þar voru m.a. höfð ummæli um forstöðumanninn og eiginkonu hans eftir nafngreindum bróður forstöðumannsins.

Bæði forstöðumaðurinn og konan stefndu bróðurnum og blaðamanninum, Trausta Hafsteinssyni, fyrir meiðyrði. Í niðurstöðu héraðsdóms í báðum málunum segir að blaðamaðurinn hafi leitað til viðmælandans og vitnað til frásagna hans. Ekki hafi hins vegar verið um að ræða viðtal við hann og hann fékk ekki greinina til yfirlesturs eða veitti formlegt samþykki fyrir birtingu hennar. Því teljist viðmælandinn ekki vera höfundur efnisins heldur blaðamaðurinn.

Forstöðumaðurinn krafðist þess að á fjórða tug tilgreindra ummæla í greinunum yrðu dæmd dauð og ómerk. Héraðsdómur segir í niðurstöðu sinni, að fjölmiðlar hafi rúmt svigrúm til umræðu um þjóðfélagsmálefni sem eigi erindi til almennings eins og talið verði eiga við um það efni sem um ræði í máli þessu.  Þá beri að líta til þess að blaðið birti athugasemdir og leiðréttingar að því marki sem eftir því var óskað og baðst jafnframt velvirðingar á því sem missagt kynni að hafa verið vegna þess að heimildir hefðu ekki reynst nógu traustar.

Því taldi dómurinn ekki efni til að ómerkja önnur ummæli en þau sem töldust ærumeiðandi samkvæmt  hegningarlagaákvæðum. Voru tilgreind sex ummæli, sem snéru að persónulegum málefnum forstöðumannsins og dómurinn taldi óhæfileg og  án samhengis við yfirlýst umfjöllunarefni, þ.e. meðferðarheimilið.  Með þessu hafi Trausti brotið gegn friðhelgi einkalífs mannsins.

Hann var dæmdur til að greiða forstöðumanninum 700 þúsund krónur í miskabætur og 300 þúsund krónur til að kosta birtingu dómsins.