Myndin kemur ekki beint efni fréttarinnar við. mbl.is/Jón H. Sigmundsson

Rúmur helmingur þjóðarinnar telur að fólk sé áreitt eða því mismunað vegna kynþáttar eða þjóðernis. Tæpur þriðjungur hefur séð slíkt í verki. Tölurnar eru nokkuð á skjön við niðurstöður í nágrannalöndunum.

Niðurstöður viðhorfskönnunar félags- og tryggingamálaráðuneytisins og Mannréttindaskrifstofu benda til þess að meirihluti þjóðarinnar telur að fólk sé áreitt eða því mismunað vegna kynþáttar eða þjóðernis. Tæp 57 prósent þátttakenda í könnunninni svöruðu því að þeir teldu algengt eða mjög algengt að fólki væri mismunað, á móti 42 af hundraði sem töldu það óalgent eða mjög óalgengt.

Þegar niðurstöður könnunarinnar eru bornar saman við meðaltal svarenda í ríkjum ESB má sjá að Íslendingar eru þónokkuð frá hlutfalli þeirra en ríflega 65% þátttakenda á ESB-svæðinu töldu mismunun vegna kynþátttar eða þjóðernis algenga eða mjög algenga í sínu landi. Þá má sjá að 75% þátttakenda í Danmörku og 76% í Svíþjóð töldu að mismunun ætti sér stað í þeirra heimalandi.

Þrátt fyrir jákvæðara viðhorf meðal Íslendinga þýðir það ekki að fólki sé síður mismunað hér eða það áreitt, því tæplega 26% svarenda á Íslandi höfðu orðið vitni að mismunun eða áreiti vegna kynþáttar eða þjóðernis en einungis 14% þátttakenda í ríkjum ESB (meðaltal). Hlutfallið var jafnframt lægra í Danmörku en Íslandi, eða 25% og 24% í Svíþjóð.

Skýrslan í heild sinni.