Smábátar í Hafnarfjarðarhöfn. mbl.is/Þorkell

Strandveiðar ættu að geta hafist fyrir lok mánaðar en í sjávarútvegsráðuneytinu er vinna við reglugerð í fullum gangi. Strandveiðifrumvarpið svonefnda var afgreitt frá Alþingi sem lög í gærkvöldi og tóku lögin þegar gildi. Gert er ráð fyrir að þeirri vinnu ljúki í næstu viku og Fiskistofa hefji afgreiðslu leyfa strax í kjölfarið.

Í bráðabirgðaákvæði laganna kemur fram að auk þeirra aflaheimilda sem úthlutað er á fiskveiðiárinu 2008/2009 er í júní, júlí og ágúst 2009 heimilt að veiða á handfæri allt að 3.955 lestir af óslægðum þorski, sem ekki reiknast til aflamarks eða krókaaflamarks þeirra fiskiskipa sem stunda handfæraveiðar. 

Arthur Bogason, formaður Landssambands smábátaeigenda, sagði í samtali við Morgunblaðið nýverið að hann telji þá fyrst og fremst geta nýtt strandveiðarnar sem séu á atvinnuveiðum núna og þeir sem eigi verkefnalausa báta. Hann telur að strandveiðunum verði fagnað í mörgum plássum, þar sem smábátum hefur fækkað mikið á síðustu árum

Sjávarútvegsráðuneytið hefur áætlað að umsækjendur verði um 300 og Fiskistofa áætlar að aukinn kostnaður stofnunarinnar við eftirlit með veiðunum verði á bilinu 4,5-6,5 milljónir króna.

Landinu verði skipt í eftirfarandi fjögur landsvæði: A. Eyja- og Miklaholtshreppur – Skagabyggð, B. Sveitarfélagið Skagafjörður – Grýtubakkahreppur, C. Þingeyjarsveit – Djúpavogshreppur, D. Sveitarfélagið Hornafjörður – Borgarbyggð.

Strandveiðarnar eru bundnar sex skilyrðum. Þau eru eftirfarandi:

1.      Óheimilt er að stunda veiðar föstudaga og laugardaga.

2.      Hver veiðiferð skal eigi standa lengur en 14 klukkustundir. Miðað er við þann tíma er fiskiskip lætur úr höfn til veiða til þess er það kemur til hafnar aftur til löndunar. Aðeins er heimilt að fara í eina veiðiferð á hverjum degi.

3.      Tilkynna skal Fiskistofu um sjósókn fiskiskipsins í samræmi við reglur sem ráðherra setur þar um.

4.      Aldrei er heimilt að hafa fleiri en fjórar handfærarúllur um borð. Engin önnur veiðarfæri en handfærarúllur skulu vera um borð.

5.      Á hverju fiskiskipi er aðeins heimilt að draga 800 kg af kvótabundnum tegundum í hverri veiðiferð.

6.      Skylt er að landa öllum afla í lok hverrar veiðiferðar og skal hann veginn og skráður endanlega hér á landi. Um vigtun, skráningu og meðferð afla fer að öðru leyti samkvæmt ákvæðum laga nr. 

Lögin í heild sinni

Smábátar í höfninni á Flateyri. mbl.is/Ómar