Bandaríska sjónvarpsstöðin ABC hefur í vikunni fjallað ýtarlega, bæði í sjónvarpsþáttum og á fréttavef sínum um Ísland og áhrif fjármálakreppunnar á íslensku þjóðina.

Þar er dregin upp mynd af fiskimannaþjóð, sem varð að milljarðamæringum, tapaði síðan öllu og sækir nú sjóinn á ný.

Meðal annars er rætt við íslenskan sjómann, Stefán Álfsson, sem segist hafa hætt á sjó og farið að selja verðbréf í fjárfestingarbanka. „Við gátum leyft okkur meira. Ég keypti stærra hús, stærri og betri bíla, stærri snjósleða," segir hann. 

Stefán missti vinnuna í bankahruninu og segist nú vera farinn aftur á sjóinn. „Maður er kannski lengur úti en skynsamlegt er og á leiðinni heim skellur á óveður. Það verður samt að sigla skipinu heim... gegnum erfiðu tímana, þeir hafa gert okkur að þeirri þjóð sem við erum."

Rætt er einnig við Bubba Morthens, sem sagður er hafa tekið sinn þátt í uppganginum og vingast við útrásarvíkingana. Bubbi segist hafa tapað miklu fé í hruninu og leiti nú lífshamingjunnar með öðrum hætti.

„Ég á nýfætt barn, ég á fallega konu, ég á vini, ég á fjölskyldu, ég á gítarinn minn; ég þarf ekki annað," segir hann. „Lífið heldur áfram." 

Umfjöllun ABC