Fjöldi gesta heimsækir Þingvelli á hverju ári. mbl.is/Sverrir.

Þingvallanefnd hefur hafið undirbúning að því að stækka fræðslumiðstöðina ofan við Hakið á Þingvöllum. Ætlunin er m.a. að byggja nýja snyrtiaðstöðu með það í huga að bæta þjónustu og aðgengi að þjóðgarðinum.

Þingvallanefnd hefur lagt málið fyrir Skipulagsstofnun sem hefur úrskurðað að framkvæmdin þurfi ekki að fara í umhverfismat. Árið 2001 var byggð um 220 m² fræðslumiðstöð við Hakið, en nú er fyrirhugað að stækka miðstöðina um 800 m² og byggja nýja, allt að 150 m² snyrtiaðstöðu á um 340 m² lóð. Við fræðslumiðstöðina eru nú  27 bílastæði og 5 stæði fyrir rútur, en áformað er að stækka bílastæðið þannig að rútustæðum muni fjölga um 5 og bílastæðum um 38.

Að mati Þingvallanefndar er búist sé við heildargestafjöldi í fræðslumiðstöðina á ári verði um 400.000 eða um 2000 gestir á dag. Markmiðið með fyrirhuguðum framkvæmdum er að bæta
aðgengi að þjóðgarðinum á Þingvöllum og auka þjónustu við gesti hans.

Skipulagsstofnun segir í umsögn sinni að ljóst sé að helstu neikvæðu áhrif fyrirhugaðra framkvæmda verði vegna röskunar eldhrauns sem nýtur sérstakrar verndar skv. 37. gr. náttúruverndarlaga. "Um er að ræða svæði sem verður fyrir óafturkræfu raski og verða áhrifin því nokkuð neikvæð á jarðmyndunina. Sjónræn áhrif framkvæmdanna verða að einhverju marki neikvæð, þ.e. ásýnd svæðisins breytist þar sem mannvirki verða umfangsmeiri og því meira áberandi en við núverandi aðstæður. Skipulagsstofnun telur að neikvæð áhrif á gróður verði ekki veruleg. Um er að ræða framkvæmdir innan þjóðgarðsins á Þingvöllum og telur Skipulagsstofnun mikilvægt að öllu raski verði haldið í lágmarki eins og framkvæmdaraðili boðar."